Мансур Гыйләҗев: Авторларга режиссерлардан һәм артистлардан ярдәм кирәк

«Тапшырылган 17 пьеса арасында алтысы финалга чыкты. Икешәр спектакль белән Камал театрында ике көн читкалар уздырылды. Артистлар пьесаларны искиткеч яхшы укый. Алмаз Гәрәев Раил Сафинның «Богау» пьесасын укыганда елап җибәрде. Фәннур «Кара алтын» пьесасын моноспектакль итеп укыды: мавыгып кереп китте пьесага – уйнап күрсәтте. Пьесаларның укылган кадәресе буенча актерлардан җылы сүзләр ишеттек. Бөек актерлардан зур бәя бирелде.

Тагын ике пьеса Кариев театрында укылачак. Аның берсе 14 яшьлек авторыбызныкы – мин аның пьесасы читкага узганга бик шатландым. Ул балалар өчен музыкаль спектакль язган. Безнең балалар өчен язылган бөтен әкиятләрдә Шүрәле белән Су анасы – шуның белән чикләнә. Бу автор – бала дип әйтергә була – грек мифологиясенә нигезләнеп язган. Бу мине бик нык шатландырды.

Лаборатория Әлмәттә дә бара: аларның читкалары конкрет театрларга бүленде – театрлар эскизлар ясый. Бездә дә шулай яшь режиссерлар алынса, әйбәт булыр иде. Авторлар нык дулкынлана. Берсе дә язуны ташлыйбыз дип әйтмәде. Бөтенесе дә дәвам итәргә әзер. Авторларга режиссерлардан һәм артистлардан ярдәм кирәк. Чөнки без бер күзлектән карасак, сәхнә профессионаллары бөтенләй башка күзлектән карый: рольләр бармы, образлар бармы, характерлар бармы, конфликт бармы, хәрәкәт бармы – җыеп әйткәндә, артитсларга уйнарга нигез бармы? Шул мәсьәләдә яшь авторларга бик нык ярдәм кирәк. Безнең кинорежиссерлар республикада игътибар җитмәү сәбәпле Мәскәүгә китә, ә драматурглар Уфага китсә генә...», – ди ул.

Мансур Гыйләҗевнең фикерләрен «Интертат» сайты өчен Рузилә Мөхәммәтова язган.

• Мансур Гыйләҗев: Берсе дә язуны ташлыйбыз дип әйтмәде – безгә театрларның ярдәме кирәк