Халыкара туган телләр көне алдыннан КФУда фәнни-методик онлайн-семинар узачак
20 февральдә Казан федераль университетының Филология һәм мәдәниятара багланышлар институтында унынчы тапкыр «Телләргә өйрәтү методикасын камилләштерү: алдынгы тәҗрибә белән уртаклашу мәйданчыгы» дип аталган Халыкара фәнни-методик онлайн-семинар узачак. Бу хакта Филология һәм мәдәниятара багланышлар институтының матбугат хезмәте хәбәр итә.
Әлеге чараны оештыручылар – институтның «Туган телләр һәм мәдәниятләр өлкәсендә стратегик тикшеренүләр» һәм «Каюм Насыйри институты» фән һәм белем бирү үзәкләре, гомуми тел белеме һәм тюркология кафедрасы әгъзалары.
Семинарның төп максаты – Россия һәм чит ил педагоглары, фәнни хезмәткәрләрнең туган телләр һәм мәдәниятләрне өйрәнү, яшь буынга тапшыру юнәлешендә тәҗрибә алмашуы. Бу чара ел саен февраль аенда Халыкара туган телләр көне алдыннан үткәрелә. X Халыкара семинарга чит ил һәм Россия төбәкләре педагогларыннан 100дән артык гариза кабул ителде.
Семинарның пленар утырышында Казахстан, Үзбәкстан югары уку йортлары вәкилләре, Казан федераль университеты галимнәре, Якутск һәм Екатеринбургта эшләүче педагоглар үз тәҗрибәләре белән уртаклашачак. Чыгышлар 1926 елда Баку шәһәрендә узган Беренче тюркология съезды һәм анда катнашкан татар делегациясе, Казахстанның күренекле мәгърифәтчесе А.Байтырсуновның казах орфографиясен үстерүгә керткән роле, Габдулла Тукай һәм ХХ йөз үзбәк шагыйрьләре арасындагы бәйләнешләр, үзбәк студентларына рус телен өйрәтү алымнары, татар телен өйрәтү һәм татар мәдәниятен таратуда фән һәм белем бирү үзәкләренең эшчәнлегенә багышлана.