Казанда 27нче гимназия түбәсенең бер өлеше җимерелгән
Төнлә Казанда Һади Такташ исемендәге татар телендә белем бирә торган 27нче гимназия түбәсенең бер өлеше җимерелеп төшкән. Зыян күрүчеләр юк, инженерлык коммуникацияләре дә зыян күрмәгән. Бу хакта Казанның Вахитов һәм Идел буе районнары башлыгы Альберт Салихов хәбәр итте.
Аның сүзләренчә, иртән урынга Башкарма комитет җитәкчесе Рөстәм Гафаров җитәкчелегендәге оператив төркем килгән.
«Эшчеләр бригадасы объектка килде инде, якын арада ремонт эшләре башланачак», – дип язган Салихов үзенең Telegram-каналында.
Фото: t.me/AISalikhov/1082
Гимназия бинасы республика әһәмиятендәге мәдәни мирас объекты статусына ия. Мәгариф учреждениесендә 731 укучы белем ала.
Фото: t.me/AISalikhov/1082