Бөгелмә китапханәсендә Россия халыклары бердәмлеге елын ачу тантанасы булды
Бөгелмә китапханәсендә Россия халыклары бердәмлеге елын ачу тантанасы үткәрелде. Бу хакта «Бугульминская газета» сайты хәбәр итә.
Очрашуның мактаулы кунагы, район Советы депутаты һәм «Бердәм Россия» партиясенең җирле бүлекчәсе башкарма секретаре Әнвәр Әхмәдиев яшьләргә мөрәҗәгать итеп, гади, әмма мөһим хакыйкатьне искә төшерде: хәзерге тыныч булмаган дөньяда нәкъ менә бердәмлек дәүләтебезнең куәте һәм иминлеге нигезе булып тора.
Китапханәчеләр башкаруында Россиянең чиксез киңлекләре турындагы шигырьләр очрашуга ямь өстәде. Алып баручы катнашучыларны гасырлар аша уздырды: балаларның күз алдында тарих битләрен җанландырдылар — 1812 елгы сугыш, Бөек Ватан сугышының авыр сынаулары...
Кунакларның үз тамырлары турында сөйләүләре очрашуның күңелне кузгатырлык мизгеле булды.
Яшьләр галәмне буйсындыру, тыныч атом булдыру, зур Кырым күпере төзү һәм Россиянең башка казанышлары турында да кызыксынып тыңлады. Бу казанышлар — төрле милләт галимнәре һәм эшчеләренең уртак тырышлыгы нәтиҗәсе.
Һөнәрчелек йорты осталары бәйрәмнең үзенчәлекле атмосферасын тудырды. Алар талисманнар, уенчыклар, макраме, чигү һәм чүлмәк савытлары күргәзмәсен әзерләгән иде.
Тамашачылар «Предметны чамалагыз» уенында да катнашты.
Бәйрәм җыр-биюләр белән тәмамланды. Татар мәдәнияте үзәге, «Мерчен» чуваш җыр ансамбле артистларының матур костюмнары, күңелгә ятышлы татар һәм чуваш көйләре, дәртле рус һәм татар халык биюләре, «Кояшкай» үрнәк коллективы биюләре тамашачыларның игътибарын җәлеп итте.