Татарстан Гидрометеоүзәге себер антициклоны якынлашуы турында кисәтте
Бу атна ахырында Татарстанда сизелерлек салкынайтачак, бу себер антициклоны йогынтысы белән аңлатыла. Бу хакта «Татар– информ»га ТР Гидрометеорология үзәге башлыгы Феликс Гоголь хәбәр итте.
«Кышын салкын һәм җылылык дулкыннары чиратлаша. Хәзер салкыннар дулкыны якынлаша. Пәнҗешәмбе көнне республика себер антициклоны перифериясендә булачак, һава шартлары сизелерлек үзгәрә башлаячак», - дип билгеләде ул.
15 гыйнварда күпчелек территориядә явым-төшем булмаячак, бары тик көньяк-көнбатышта гына, атмосфера фронты якын булу сәбәпле, төнлә бераз кар явуы ихтимал. Температура фоны түбәнәя башлаячак. Төнлә термометр баганалары -10..-15 градус күрсәтәчәк, көнчыгышта аязганда -18 градуска кадәр, көндез -8..-13 градустан югары булмаячак.
ТР Гидрометеоүзәгенең якынча фаразына караганда, җомга һәм шимбә көннәрендә безнең төбәктә салкын антициклонлы һава торышы фаразлана. Явым-төшем ихтималы түбән, көндез һава температурасы -10..-16 градус, ә төнлә -20 градуска кадәр һәм аннан да түбәнрәк төшәчәк.
«Атна ахырында шулай ук себер антициклоны белән бәйле салкын һава торышы фаразлана. Алга таба без түбән температура фонының саклануын көтәбез», - дип йомгаклады Феликс Гоголь.