Казанда махсус операция катнашучысы Михаил Ермолин истәлегенә мурал булдырылырга мөмкин
Казанда махсус хәрби операция катнашучысы истәлегенә яңа мурал булдыру турында фикер алыштылар. Бу идея Дәүләт Думасы депутаты Илья Вольфсонның 125нче номерлы гимназиягә сәфәре барышында каралды. Парламентарий гимназиядә башкарылган капиталь ремонтның сыйфатын бәяләү өчен килде. Бу хакта «Бердәм Россия» партиясенең Татарстан төбәк бүлеге матбугат хезмәтендә хәбәр иттеләр.
Белем бирү учреждениесендә гимназияне тәмамлаган Михаил Ермолинга багышланган мемориаль зона бар. Днепр позывнойлы хәрби яр буе оборонасы 126нчы гвардия бригадасының реактив артиллерия дивизионы подполковнигы һәм командиры булып хезмәт иткән.
Фото: «Бердәм Россия» партиясенең Татарстан төбәк бүлеге матбугат хезмәте
Ермолин Чечня, Көньяк Осетия һәм Сириядәге хәрби хәрәкәтләрдә катнашкан, Жуков, Суворов медальләре, барлык дәрәҗәдәге «Хәрби хезмәттәге аерым уңышлары өчен» медале, «Төньяк Кавказдагы хезмәт өчен» медале, Сирия кампаниясендә катнашучы күкрәк билгесе һәм медале белән бүләкләнгән.
Үлгәннән соң Батырлык орденына лаек булган. Ермолин махсус хәрби операция вакытында 35 кешене утлы камалыштан чыгарган һәм икенче көнне хәрби бурыч үтәгәндә һәлак булган.
Депутат сүзләренчә, мәктәптә хәтер почмагы булдырылган, ә ишегалдында Михаил Ермолинның әнисе үз бакчасыннан алып килгән агач утыртылган. Ул гимназия фасадында герой хөрмәтенә истәлекле мурал булдыру өчен урын бар, дип билгеләп үтте һәм бу инициативаны гамәлгә ашыруга ярдәм итәргә әзер булуын белдерде.
Вольфсон ассызыклаганча, Михаил Ермолинның батырлыгы мәктәп, шәһәр һәм бөтен ил хәтерендә сакланырга тиеш.