Машинага техник карау: Татарстанда яшәүчеләргә аны кайчан үтәргә кирәк

Автомобильне техник карау – машина йөртүчеләр даими очраша торган мәҗбүри процедура. Татарстан халкына үз машиналарының төзеклеген никадәр еш тикшерергә кирәклеге турында «Татар-информ» материалында.

Техник карау барышында белгечләр транспорт чарасының төп системалары торышын бәяли. Тормозларның нәтиҗәлелеге, руль механизмының эше, фараларның һәм башка яктылык приборларының төзеклеге, пыяла чистарткычларның һәм югычларның эшләве, шулай ук покрышкаларның һәм тәгәрмәч дискларының торышы тикшерелә.

Гамәлдәге кануннар рөхсәт ителгән максималь массасы 3,5 тоннага кадәр булган яңа җиңел автомобильләр, мотоцикллар һәм йөк машиналары чыгарылганнан соң беренче дүрт ел дәвамында техосмотр узарга тиеш түгел, дип күздә тота.

Әмма такси сыйфатында кулланыла торган машиналар өчен аерым кагыйдәләр гамәлдә. Мондый автомобильләр эксплуатацияләүнең беренче биш елында ел саен техник торышын тикшерү узарга тиеш, ә аннары — елга ике тапкыр.

Дүрт елдан алып ун еллык җиңел автомобильләр ике елга бер тапкыр техник карау узарга тиеш. Әгәр дә машинага ун елдан артык икән, тикшерү ел саен үткәрелергә тиеш.

3,5 тоннадан артык авырлыктагы автобуслар һәм йөк транспорт чаралары ел саен беренче биш ел дәвамында, ә аннан соң — һәр алты ай саен техник карау узарга тиеш.