Аксубайда үзәк чыршы янында балалар өчен кышкы уеннар оештырыла
Мәктәптән тыш эшләр үзәге хезмәткәрләре Аксубайның 1нче номерлы мәктәбе педагоглары белән берлектә район балалары өчен актив һәм файдалы кышкы ял оештыра. Бу хакта «Аксубай» газетасы хәбәр итте.
Балалар гаджетлардан бик теләп аерылып торды, яңа чирек башланыр алдыннан күтәренке кәеф һәм көч алды, диелә хәбәрдә.
Саф һавада хәрәкәтчән уеннар балаларга уңай эмоцияләр бүләк итеп кенә калмый, ә аларның сәламәтлеген һәм физик формасын ныгытырга да ярдәм итә.
Үзәк чыршы янындагы уеннар 5 һәм 6 гыйнварда дәвам итәчәк. Чара 10:00 сәгатьтә башлана.