«Голос. Дети» финалисты булган Түбән Кама кызы Арина Кияшко «Голубой огонёк»та катнаша
«Голос.Дети» шоуының 12нче сезоны финалисты Түбән Кама кызы Арина Кияшко төп телевизион Яңа ел концерты – Беренче каналдагы «Голубой огонёк» йолдызларының берсе булачак. Кыз «Татар-информ»га программада катнашуын раслады.
«Голос.Дети» проектының барлык финалистлары белән бергә Беренче каналда «Голубой огонёк»та «Буратино» җыры белән чыгыш ясадык. Эмоцияләр искиткеч! Безне Яңа ел төнендә карагыз!» - диде яшь җырчы.
Фото: Арина Кияшконың шәхси архивыннан / Арина Кияшко тәкъдим итте
14 яшьлек Арина Кияшко көзен «Голос.Дети»да сайлап алу этабын уңышлы узды һәм Аида Гарифуллинаның командасын сайлады. Финалда кыз 35,6 процент тамашачыларның тавышын җыйды һәм икенче урын яулады.