Фирдүс Тямаев Аксубайда махсус операциядәгеләрнең балалары өчен бәйрәм оештырды

Аксубай район мәдәният йортында махсус хәрби операция геройлары балалары өчен Татарстанның атказанган артисты Фирдүс Тямаев оештырган бәйрәм узды. Бу хакта «Аксубай» сайты хәбәр итә.

Фойеда бизәлгән чыршы янында чын могҗиза атмосферасы хөкем сөрде. Кыш бабай белән Кар кызы балаларны музыкаль әкияткә чакырды.

Балалар шатланып Фирдүс Тямаевка кушылып җырладылар, биеделәр, бәйгеләрдә катнаштылар һәм әкият персонажларыннан тәм-томнар белән сыйландылар.

Артист Аксубай, аның халкы һәм Ватанны саклаучылар турында җылы сүзләр әйтте. Ахырда ул татар телендә район турында яраткан җырын башкарды, аның чыгышы көчле алкышларга күмелде.

Тамаша барган вакытта алгы сызыктан кыска вакытлы ялга кайтучы сугышчының залга килеп керүе аеруча дулкынландыргыч мизгел булды. Ул хатынына чәчәк бәйләме бүләк итте һәм балаларын кочаклап алды.

Җыелучыларны район башлыгы Алмаз Мингулов сәламләде. Ул атказанган артистка волонтерлык инициативасы өчен рәхмәт белдерде.

Чара ахырында катнашучыларны сюрприз: Татарстан Рәисе Рөстәм Миңнехановтан, район башлыгыннан һәм оештыручы Фирдүс Тямаевтан яңа ел бүләкләре көтте, диелә хәбәрдә.