Миңнеханов инвестиция процесслары вакытын киметү буенча эшне дәвам итәргә кушты
Татарстан Рәисе Рөстәм Миңнеханов республика Хөкүмәтенә, муниципалитетларга һәм ресурслар белән тәэмин итүче оешмаларга инвестиция процессларын узу вакытын киметү буенча уртак эшне дәвам итәргә кушты.
Йөкләмә Татарстан Министрлар Кабинетының инвестицияләр климаты торышын яхшырту һәм «Нәтиҗәле төбәк» пилот проектын тормышка ашыру мәсьәләләренә багышланган утырышта бирелде. Аны Татарстан Премьер-министры Алексей Песошин уздырды, дип хәбәр итә республика җитәкчесенең матбугат хезмәте.
Премьер-министр белдергәнчә, республиканың Министрлар Кабинеты инвестиция потенциалын үстерүгә, инвестицияләр климатын яхшыртуга һәм эшмәкәрлек алып бару өчен уңайлы шартлар тудыруга йөз тоткан эшне дәвам иттерә. Россия Президенты Владимир Путин указы белән расланган ил үсешенең илкүләм максатлары күрсәткечләренә караганда, төп капиталга инвестицияләр күләме 2030 елга 2020 ел белән чагыштырганда кимендә 60 процентка артырга тиеш.
Ел саен яңа проектларны эшләтеп җибәрү буенча Стратегик инициативалар агентлыгы төбәкләрне Федерация субъектларында инвестицион климат торышының илкүләм рейтингы кысаларында бәяли. Татарстан, алтынчы ел рәттән икенче урынны алып, рейтингта үз позициясен нык тота.
«Республикадагы агымдагы эшлекле климатны даими анализлап тору һәм эшмәкәрлекне алып бару шартларының сыйфатын арттыру өчен резервлар эзләү ярдәмендә шушындый нәтиҗәгә ирешеп булды. Инвесторларның дәүләт структуралары белән үзара хезмәттәшлегенең үтә күренмәлелеген тәэмин итү, төп хезмәтләр алуның барлык этапларында инвесторларның хокукларын яклау механизмнарын регламентлаштыру максатларында республикада инвестиция стандарты кертелде», – диде Алексей Песошин.
Аның сүзләренчә, алга таба административ барьерларны киметү өчен «Росатом»ның методологик ярдәме белән Татарстанда «Үтәли инвестицион агым» проектын тормышка ашыру дәвам итә. Аның максаты – инвестиция проектларын әзерләү һәм тормышка ашыруда, шул исәптән инвесторлар өчен барлык төп процедураларны узганда сарыф ителә торган вакыт һәм ресурсларны киметү резервларын эзләү.