Татарстанда кукурузны барлык мәйданнарның яртысыннан артыгында суктырасы калган
Татарстанда ашлыкка дигән кукурузны 30,5 мең гектардан (ул барлыгы 50 мең гектар мәйданны били) җыеп аласы калган. Вице-премьер – ТР авыл хуҗалыгы һәм азык-төлек министры Марат Җәббаров республика Хөкүмәтендә узган традицион киңәшмәдә шулай дип белдерде.
Барлык муниципалитетлар белән видеоконференция элемтәсе режимындагы киңәшмәне Рөстәм Миңнеханов үткәрде. Чарада шулай ук ТР Дәүләт Советы Рәисе Фәрит Мөхәммәтшин һәм ТР Премьер-министры Алексей Песошин да катнашты, дип хәбәр итә республика җитәкчесенең матбугат хезмәте.
Докладчы сүзләренчә, соң өлгерә торган башка культураларны җыю да дәвам итә. Әйтик, 212 мең гектарны биләгән көнбагышны әле 51,4 мең гектарда (планның 24 проценты) җыеп аласы бар. Яшелчәләр дә 110 гектарда алынмаган (планның 6 проценты).
Моннан тыш, шикәр чөгендере 55,6 мең гектар мәйданның 12,8 мең гектарында (планның 23 проценты) казып алынмаган. Атап әйткәндә, Буа (3124 гектар), Тәтеш (2450), Сарман (2225) һәм Зәй (967) районнары хуҗалыкларында әле эш күләме шактый.
Бүгенгә 1,9 миллион тонна татлы тамыр (планда – 2,5 миллион) казып алынган. Уртача уңыш гектарыннан 462 центнер тәшкил итә. Төбәктә параллель рәвештә шикәр чөгендерен эшкәртү дә оештырылган. Заводларга 876 мең тонна татлы тамыр китерелгән, сезон башыннан алып 606 мең тоннан шикәр чөгендере эшкәртелгән, яңа уңыштан 83 мең тонна шикәр җитештерелгән, дип искәртте Җәббаров.