Гвинея-Бисау Президенты Казанга килде - аэропортта аны Миңнеханов каршы алды
Гвинея-Бисау Президенты Умар Сисоку Эмбало Казанга килде. Татарстан башкаласының халыкара аэропортында аны республика Рәисе Рөстәм Миңнеханов каршы алды.
Татарстан Рәисе матбугат хезмәте җитәкчесе Лилия Галимова искәрткәнчә, чит ил лидеры республикага Татарстан җитәкчесе чакыруы буенча килгән. Узган атнада алар Гамбиядә Ислам хезмәттәшлеге оешмасында катнашучы илләр һәм хөкүмәт башлыклары саммитында очрашты.
Умар Сисоку Эмбало кичә Мәскәүдә Бөек Ватан сугышында Җиңүнең 79 еллыгына багышланган тантаналарда катнашты һәм Россия Президенты Владимир Путин белән сөйләшүләр үткәрде. Ул Казанга башкаладан килде.