Махсус операциядә катнашучылар дәүләт бүләгенә лаек булган өчен акчалата премия алачак
Күрсәткән батырлыклары өчен махсус хәрби операциядә катнашучыларны төрле дәүләт бүләкләре белән билгеләп үтәләр, аларга бер тапкыр бирелә торган акча да өстәлә, аны РФ Саклану министрлыгы түли. Бу турыда «Татар-информ» яза.
Мондый хокук «Хәрби хезмәткәрләр өчен акчалата премия һәм аларга аерым түләү тәкъдим итү турында»гы закон һәм РФ Президентының «Федераль дәүләт хезмәте узучы (узган) затларны бер тапкыр бүләкләү турында»гы Указы нигезләмәләре буенча каралган.
Искәртеп узабыз, хәрби хезмәткәр үлгәннән соң дәүләт бүләге тапшырганда акча аның законлы хатынына, әти-әнисенә, балаларына, шулай ук һәлак булучының тәрбиясендә булган затларга түләнә. Хәрби хезмәткәрне бүләкләү турындагы РФ хокукый акты дөнья күргәннән соң 6 ай эчендә аның гаилә әгъзаларына, акча түләүне сорап, һәлак булган хәрби хезмәткәр вазифа биләгән хәрби частькә мөрәҗәгать итәргә кирәк. Берничә гаилә әгъзасы мөрәҗәгать иткән очракта, акча гаилә әгъзалары арасында тигез итеп бүленә.
Нинди бүләкләр өчен акчалата премия каралган?
- «Алтын Йолдыз» медале – дәүләт һәм халык алдында батырлык кылу белән бәйле хезмәтләре өчен,
- «Батырлык» ордены – тормыш өчен куркыныч тудырган шартларда хәрби бурыч үтәгән вакытта кылган кыюлык һәм тәвәккәл гамәлләр өчен,
- «Батырлык өчен» медале – Ватан һәм РФ дәүләт мәнфәгатьләрен яклаганда, РФ дәүләт иминлеген тәэмин итү буенча махсус биремнәр үтәгән вакытта сугышта күрсәткән шәхси батырлык һәм кыюлык өчен,
- Георгий тәресе – Ватанны саклау өчен сугышларда, халыкара тынычлык һәм иминлекне саклаган яки торгызганда башка дәүләтләрнең территориясендәге сугыш хәрәкәтләре барышында хәрби бурыч үтәгәндә күрсәткән батырлык өчен,
- «Кыюлык өчен» медале – Ватанны һәм РФ дәүләт мәнфәгатьләрен яклау, шулай ук халыкара тынычлык һәм иминлекне саклау һәм торгызу буенча хәрби һәм башка операцияләр барышында күрсәткән батырлык һәм кыюлык өчен,
- «Ватан алдындагы хезмәтләр өчен» медале – Ватанны саклау эшенә зур өлеш керткән, хәрби идарә, берләшмәләр, хәрби частьләр һәм РФ Кораллы көчләре оешмалары үзәк органнарының югары хәрби әзерлеген саклауда уңышлар, законлылык һәм хокук тәртибен ныгыткан, дәүләт иминлеген тәэмин иткән һәм дәүләт каршындагы башка казанышлар өчен.
Дәүләт бүләкләренең тулы исемлеге «Россия Федерациясе дәүләт бүләкләү системасын камилләштерү буенча чаралар турында»гы РФ Президенты Указында бирелә.
Бүләк тапшырган өчен акчалата премия күләме, «Алтын Йолдыз» медаленнән тыш, хәрбинең айлык хезмәт хакының биш окладын тәшкил итә. «Алтын Йолдыз» медален тапшырган вакытта акчаның күләме хәрбинең айлык хезмәт хакының ун окладын тәшкил итә.
Искәртеп узабыз, хәрби хезмәткәрнең айлык оклады хәрби вазифа буенча оклад һәм хәрби дәрәҗә буенча окладтан тора.
- Россия Кораллы көчләре сафларында контракт буенча хезмәт итү, шулай ук премияләр, ташламалар һәм түләүләр турында heroes-tatarstan.ru сайтында яки 117 телефоны аша күбрәк белергә мөмкин.