Атна ахырына Татарстанда -7 градуска кадәр суыта
Татарстанда атна дәвамында әкренләп суыта башлый. Бу хакта Татарстан Гидрометеорология үзәге хәбәр итә.
Иртәгә, 14 ноябрьдә, республика әле циклонның арткы өлешендә урнаша. Бераз яңгыр һәм көчле җил көтелә. Төнлә термометр баганалары +2..+5 градус, ә көндез +4..+8 градус күрсәтәчәк.
15 ноябрьгә циклон чигенәчәк. Явым-төшем бик аз, төнлә көнчыгышта гына бераз яңгыр яварга мөмкин. Температура түбәнәя башлый: төнге сәгатьләрдә 0 дән 3 градуска кадәр һәм көндезге вакытта 2 дән 5 градуска кадәр.
16 ноябрьдә урыны белән яңгыр һәм җепшек кар фаразлана. Төнлә температура 0 градустан түбән төшәчәк: -2..+2 градус, ә көндез +1..+4 градустан югары күтәрелми.
Җомга көнне, 17 ноябрьдә, төнлә урыны белән аз гына җепшек кар ява. Һава температурасы -3..+2 градус фаразлана.
18 ноябрьдә термометр баганалары төнлә -2..-7 градус, көндез 0..+5 градус күрсәтәчәк.
Синоптиклар юлларда бозлавык турында кисәтә.