Казанның муниципаль парковкалары өч көн рәттән бушлай эшләячәк
4-6 ноябрьдә Казан халкы һәм кунаклары урам-юл челтәре буйлап урнашкан муниципаль парковкалардан бушлай файдалана алачак. Бу Халыклар бердәмлеге көнен бәйрәм итү белән бәйле, дип хәбәр итте Казан мэриясе.
Быел бәйрәм шимбәгә туры килде. Шуңа күрә ял көне 6 ноябрьгә күчерелә. Шәһәр Башкарма комитеты карары нигезендә, бу көнне муниципаль парковкалар түләүсез эшләячәк.
Шимбә һәм якшәмбе көннәрендә алардан бушлай файдаланырга мөмкин.
М.Вахитов урамындагы «тоткарлаучы» паркинг һәм «Авиатөзелеш» метро станциясе янындагы җир асты парковкасы гадәти режимда эшләячәк, дип хәбәр итә ТР башкаласының Транспорт комитеты.
Исегезгә төшерәбез, 2022 елда Казанда муниципаль парковкалардан файдаланучылар саны 100,5 мең автомобильчегә арткан. Эш көннәрендә түләү 8:00 дән 19:00 гә кадәр алына, диелә хәбәрдә.