Ульяновскида Болгар дәүләт тарихи-архитектура музей-тыюлыгы фондлары күргәзмәсе ачылды
Ульяновск өлкәсенең Иван Гончаров исемендәге Туган якны өйрәнү музеенда 19 сентябрь көнне 14.00 сәгатьтә «Бөек Болгар» экспозициясе эшли башлый. Бу хакта «Өмет» газетасы сайтына сылтама белән Бөтендөнья татар конгрессы матбугат хезмәте хәбәр итә.
Кунакларга Болгар дәүләт тарихи-архитектура музей-тыюлыгы фондларыннан 550дән артык экспонат тәкъдим ителә. Алар Идел буе Болгар урта гасыр дәүләте матди мәдәнияте үсешенең югары дәрәҗәсен чагылдыра.
Рәссамнарның Болгар күренеше сурәтләнгән картиналары борынгы шәһәрнең уникаль мәдәни ландшафты белән таныштыра. Күргәзмәдә шулай ук 1940-1950 елларда Болгар шәһәрчегендә археологик казу эшләрендә катнашкан Дмитрий Архангельскийның акварель эшләре тәкъдим ителгән. Соңгы дистә елларда тикшеренү барышында табылган археология предметлары дәүләт халкы тормышының төрле яклары — һөнәрчелек, сәүдә, хәрби эш, көнкүреш һәм мәдәниятен чагылдыра.