Санкт-Петербургта беренче тапкыр Баязитов укулары булды
14 сентябрьдә «Хәзерге дөньяда дини кыйммәтләр» II Петербург динара форумы кысаларында Санкт-Петербург дәүләт университеты мәйданчыгында «I Баязитов укулары» халыкара фәнни-гамәли конференциясе узды. Конференциянең темасы «Теология - диннәр һәм милләтләр арасында диалог теле» булды, дип хәбәр ителә Россия мөселманнары Дини җыены сайтында.
Сессиянең модераторы Санкт-Петербург университетының Теология институты директоры профессор Дмитрий Шмонин булды.
Укуларда Санкт-Петербург һәм Россиянең Төньяк-Көнбатыш төбәге мөфтие Равил хәзрәт Панчеев, Санкт-Петербург университетының Тарих институты директоры Абдулла Даудов, Россия Ислам университеты ректоры профессор Рафик Мөхәммәтшин, Ислам мәгарифенә, фәненә һәм мәдәниятенә ярдәм фонды директоры урынбасары профессор Али Вячеслав Полосинның сәламнәре җиткерелде һәм докладлары тәкъдим ителде.
Чара ахырында Санкт-Петербург мөселманнары Диния нәзарәте һәм «Әл-Мостафа» халыкара университеты арасында хезмәттәшлек турында килешү имзаланды, диелә хәбәрдә.