Миңнеханов һәм Чернышенко Иннополис университеты тулай торакларының яңа корпусларын ачты

Россия вице-премьеры Дмитрий Чернышенко һәм Татарстан Рәисе Рөстәм Миңнеханов Белем көнендә Иннополис университеты тулай торакларының яңа корпусларын ачты. Аларны төзү өчен федераль бюджеттан 2,5 миллиард сум акча бүленгән.

«Бу – федераль Хөкүмәтнең зур ярдәме, илебездә алып барыла торган зур эш. Университетны үстерү өчен әлеге өч бина кирәк иде. Алар планнан тыш сафка бастырылды», - диде республика Рәисе.

Миңнеханов мәгариф, инновацияләр һәм цифрлаштыру өлкәсенә ярдәм күрсәткәне өчен Россия җитәкчелегенә рәхмәт белдерде. «Без моны тоябыз. Бүген Татарстанда 11 яңа мәктәп ачылды, 57 мең беренче сыйныф укучысы тәүге мәртәбә мәктәп бусагасын атлап керде», - дип искәртте ул.

Фото: © Владимир Васильев / «Татар-информ»

Татарстан Рәисе билгеләп үткәнчә, Иннополиста уңайлы яшәү һәм эшләү өчен барлык шартлар да тудырылган, ә бу шәһәрдәге университет – Россиядәге иң перспективалы уку йортларының берсе.

Чернышенко РФ Хөкүмәтенең белем бирү өчен инфраструктураны үстерүгә гаять зур игътибар күрсәтүен әйтте. Быел «Фән һәм университетлар» илкүләм проекты нигезендә студент тулай тораклары төзүгә ил буенча тулаем алганда 13,5 миллиард сум акча бүлеп бирелгән.

«Иннополиста да иң заманча технологияләр кулланып кыска вакыт эчендә уникаль тулай тораклар сафка бастырылды», - дип белдерде вице-премьер.

Россия Президенты Владимир Путин күрсәтмәсе белән 2030 елга дөнья дәрәҗәсендәге 25 кампус төзеләчәк. Биналарны проектлау, төзү һәм эксплуатацияләү өчен Иннополиста кулланылган технологияләр файдаланылачак.

Соңыннан Миңнеханов һәм Чернышенко бер тулай торак белән танышты. Аларга заманча бинаның ишеген робот ачты.

Белем көне уңаеннан үткәрелгән тантаналы җыелышта кунаклар университет холлында беренче курс студентларын сәламләде һәм ясалма интеллект кертү буенча проектлар тәкъдим ителгән стендларны карады.