Татарстанда 2024 елда БРИКС саммитын үткәрү буенча оештыру комитеты төзелде
Татарстан Рәисе Рөстәм Миңнеханов 2024 елда Россиянең БРИКС берләшмәсендә рәислек итүе кысаларында чаралар әзерләү һәм үткәрү буенча республика оештыру комитетын төзү турындагы указны имзалады. Документ хокукый мәгълүмат порталында урнаштырылган.
«2024 елда Россиянең БРИКС берләшмәсендә рәислек итүе кысаларында чаралар әзерләү һәм үткәрү буенча республика оештыру комитетын төзергә», - диелә текстта.
Рөстәм Миңнеханов – комитетның рәисе, ТР Премьер-министры Алексей Песошин, ТР Рәисе Администрациясе җитәкчесе Әсгать Сәфәров һәм Казан мэры Илсур Метшин (килештерү буенча) аның урынбасарлары итеп билгеләнде. Комитет составына республика министрлыклары һәм ведомстволары башлыклары һ.б. керде.
Татарстан Министрлар Кабинеты алдында оператив штаб, шулай ук чаралар әзерләү һәм үткәрүнең аерым юнәлешләре буенча эшче төркемнәр төзү бурычы тора.
Искәртеп узабыз, Россия Президенты Владимир Путин апрель аенда Казанның киләсе елда БРИКС саммитын үткәрү урыны булачагын раслаган указны имзалаган иде. Чаралар Россиянең 15 шәһәрендә узачак, Татарстан башкаласындагы саммит үзәк вакыйга булачак.