Дәүләт Думасы зур бизнестан өстәмә табышка салымны хуплады

Дәүләт Думасы РФ Хөкүмәте тәкъдим иткән, зур компанияләр өчен өстәмә табышка салым билгели торган закон проектын өченче укылышта кабул итте. Бу хакта Федераль Җыенның түбән палатасы матбугат хезмәте хәбәр итә.

Закон проектында искәртелгәнчә, салым 2021 һәм 2022 еллар өчен салымга кадәрге уртача табышы 1 миллиард сумнан артып киткән оешмалардан алыначак. Аны санаганда 2021 һәм 2022 еллардагы табышның уртача күләме 2018 һәм 2019 еллардагы табышның уртача күләменнән артып китүе исәпкә алыначак. Салым ставкасы 10 процент күләмендә билгеләнә.

Өстәмә табышка салым 2024 елның 28 гыйнварыннан да соңга калмыйча түләнергә тиеш, ул федераль бюджетка күчереләчәк.

Кече һәм урта бизнес предприятиеләре, бердәм авыл хуҗалыгы салымы түләүчеләр, 2021 елның 1 гыйнварыннан соң төзелгән Россия компанияләре (үзгәртеп кору нәтиҗәсендә барлыкка килгәннәреннән тыш) һәм Россиядә 2021 елның 1 гыйнварыннан соң даими вәкиллекләр аша эшли башлаган чит ил компанияләре өстәмә табышка салым түләмәячәк.

Моннан тыш, бу нефть һәм газ тармагы компанияләре, күмер чыгару предприятиеләренә дә кагыла. Эскроу-счетлар аша эшләүче төзелеш компанияләре (2021 һәм 2022 елларда дивидендлар түләмәгән очракта), шулай ук 2023 елның 1 гыйнварына Россия Банкы һәм АСВ катнашында банкротлыкны кисәтү чаралары күрелгән финанс оешмалары да әлеге салымнан азат ителәчәк.