(Казан, 21 декабрь, «Татар-информ», Зилә Мөбәрәкшина). Казанның «Штаб» үзәгендә «Син кая?» проектын тәкъдим иттеләр. Проект төрле илләрдә яшәүче татарлар җибәргән открыткалардан тора. «Син кая?» — татарларның яшәү географиясен чагылдыруга багышланган проект. «Штаб» үзәгендә «Син кая?» дигән дөнья картасы куелган. Карта төрле илләрдән килгән открыткалар белән бизәлгән. Проект катнашучылары татарларга теләкләрен язып, төрле илләрдән Казанга открыткалар җибәргән. «Быел сентябрь башыннан барлыгы 87 илдән открытка килде, биш континентта 32 татар диаспорасы вәкилләрен таптык. Бер открытканы Татарстаннан күченеп киткән бердәнбер татар кешесе Самат дигән егет Гана Республикасыннан җибәрде. Австралиянең татар-башкорт берләшмәсе сәркатибе Диләрә Вәлифф җибәргән открытка 3 айдан соң гына килеп җитте», — диде проект катнашучысы Нияз Хәйруллин. «Штаб» үзәгендә урнашкан карта янында QR-код куелган. Теләгән һәркем шушы код аша инстаграм сәхифәсенә кереп, камерасын картага төбәп, төрле илләрдә яшәүче якташларыбызның санын, алар җибәргән хатларны укый ала. Казанда туып, Франциянең Канны шәһәрендә үскән татар кызы Әминә Нәбиуллина да проектта катнашкан. Ул открыткасын Франциядән җибәргән булган һәм хәзер туганнары янына Казанга кайткан. «Бу проект Татарстаннан булган милләттәшләрем белән элемтәләрне ныгытырга ярдәм итә. Минем кебек төрле илләрдә яшәүче татарлар бихисап», — диде ул. Татар блогеры Ләйлә Лерон проект исеменең татар әдәби телендә бик үк дөрес куелмаганына игътибар иткән. «Кечкенә чакта мин „кая“ белән „кайда“ сорауларын бутый идем. Әмма олы кешеләр бутамаска тиеш. „Кая“ дигән сүз әдәби телдә хата булып чыга. Оештыручылар моны Казан татарлары шулай сөйләшә, дип аңлата. Минемчә, Казанда я әдәби татар телендә сөйләшәләр, я бөтенләй татарча сөйләшмиләр», — диде ул. «Шулай да, бу дөнья буйлап сибелеп яшәүче татарларны берләштерүче проект. Җанисәп булганда барлык татарларны исәпләп чыгасы иде, дигән фикер тәкъдим иттем. Егетләр бу эшне башкарып чыга алган», — дип бәяләде Ләйлә Лерон. «Татар-малай» исеме белән танылган блогер Ринат Галиәхмәтов сүзләренчә, проект бер-береңә хат язу традициясен яңартып җибәргән. Оештыручылар проектның киләсе елда 22 февральдә тәмамланачагын әйтте. «Безгә килгән барлык открыткаларны җыеп, аны җыентык итеп бастырырга уйлыйбыз. Шулай ук, открыткаларны, видеомөрәҗәгатьләрне @sinkaya.tatar аккаунтында карап була», — дип аңлатты Нияз Хәйруллин.
