Хөкүмәт Болгарда Ислам динен кабул итүгә 1100 ел уңаеннан чаралар планын раслады

(Казан, 13 декабрь, «Татар-информ»). «Идел буе Болгар дәүләтендә Ислам динен кабул итүгә 1100 ел тулуны бәйрәм итүгә әзерлек өчен 71 чара үткәрү планы расланды. Эш Президент күрсәтмәсен үтәү йөзеннән алып барыла, ул быел язын бирелгән иде», - диде Хөкүмәт Рәисе урынбасары Марат Хөснуллин.           

Вице-премьер билгеләп үткәнчә, Казанда Идел буе Болгар дәүләтендә Ислам динен кабул итүгә 1100 ел уңаеннан Җәмигъ мәчете комплексын төзү мәсьәләсе буенча эш алып барыла. Комплекс үз эченә музей, китапханә һәм күргәзмә-лекция залларын алган булачак. Татарстан башкаласында төрле китапханә һәм фәнни учреждение фондларында саклана торган ислам кулъязма чыганакларын саклау, өйрәнү, популярлаштыру һәм фәнни әйләнешкә кертү буенча фәнни үзәк төзеләчәк.

Марат Хөснуллин сүзләренә караганда, үзгәрешләр башка төбәкләргә дә кагылачак. Планга шулай ук Ульяновск өлкәсендә, Түбән Новгородта, Мәскәүдә һәм башка төбәкләрдә узачак чаралар кертелгән.

Чаралар планына фәнни форумнар, түгәрәк өстәлләр һәм семинарлар оештыру, шулай ук күргәзмәләр, конкурслар үткәрү һәм басма һәм видеопродукция җитештерү дә кергән. 

Татарстан Президенты Рөстәм Миңнеханов искәртеп узганча, Идел буе Болгар дәүләте тарихы Россия һәм аның халкы тарихы белән тыгыз бәйләнгән. Планга кертелгән чаралар Россиянең уникальлеген күрсәтергә ярдәм итәчәк, анда Көнчыгыш һәм Көнбатыш мәдәнияте тыгыз үрелгән.

«Планлаштырылган чараларның кайберләре гомумфедераль әһәмияткә генә түгел, ә халыкара әһәмияткә дә ия, дип өстәде республика җитәкчесе. - Алар арасында Ислам хезмәттәшлеге оешмасы җитәкчелеге катнашында „Россия - Ислам дөньясы“ стратегик караш төркеме утырышы, „Россия - Ислам дөньясы: KazanSummit“халыкара икътисади саммиты бар».