Новости за 07.01.2026

Яңа елга аяк басу белән тагын бер милләтпәрвәрне югалттык. Озак еллар дәвамында «Туган тел» җәмгыяте рәисе булып торган, Иделаръягы районының Ислам мәгърифәтчелек үзәге активисты Тимерша Тимергали улы Вахитов фани дөньядан бакыйлыкка күчте, дип хәбәр итә Ульяновскиның «Өмет» газетасы телеграм-каналы.

Россия Федерациясе мөселманнары Диния нәзарәте рәисе, мөфти шәех Равил Гайнетдин Раштуа бәйрәмен каршылаучы Россия христианнарына котлавын җиткерде һәм аларның бәйрәм шатлыгын уртаклашты. Бу хакта Россия Федерациясе мөселманнары Диния идарәсе телеграм-каналы хәбәр итә.

Узган төндә Алабуга районының Татар Дөм-Дөме авылында янгын чыгып, 65 яшьлек ир-ат һәм аның 42 яшьлек улы һәлак булган. Бу хакта «Татар-информ»га Россия Гадәттән тыш хәлләр министрлыгының ТР буенча Баш идарәсе матбугат хезмәтендә хәбәр иттеләр.

9 гыйнвардан Россиядә тонировка кагыйдәләрен бозган автомобиль хуҗаларын штрафка тарта алачаклар. Бу таләп илгә вакытлыча кертелгән транспорт чараларына да кагыла. Бу хакта РФ Иҗтимагый палатасының закон проектларына һәм башка норматив актларга иҗтимагый экспертиза үткәрү комиссиясе әгъзасы Евгений Машаров хәбәр итте.

Узган 2025 елда «ятим һәм ата-ана тәрбиясеннән мәхрүм калган балаларны торак белән тәэмин итү» программасында катнашучылар дәүләт хисабына 450 бер бүлмәле фатир алган. Бу «Тормыш өчен инфраструктура» илкүләм проектының төп бурычларының берсен – гражданнарыбызны торак белән тәэмин итүне арттырырга мөмкинлек бирде.

РФ Президенты Владимир Путин православиеле христианнарны һәм юлиан календаре буенча бу бәйрәмне билгеләп үтүче барлык Россия гражданнарын Раштуа бәйрәме белән котлады.

Татарстанда бүген аязучан болытлы һава булачак. ТР Гидрометеоүзәге мәгълүматларына караганда, көндез республика территориясендә һәм Казанда урыны белән буран, кар, шулай ук бозлавык фаразлана.

Татарстан Рәисе Рөстәм Миңнеханов үзенең социаль челтәрләрдәге битләрендә православие динен тотучыларны Раштуа бәйрәме белән тәбрик итте.

Яңа ел бәйрәмнәрендә кешеләр ешрак нинди имгәнүләр белән мөрәҗәгать итүе турында табиб сөйләде.

Теләче районы Алан авылында «Татарстанда кыш» проекты кысаларында «Итекле хоккей» уены узган. Бу хакта «Теләче-информ» хәбәр итте.

Әлки районында 11 гыйнварга кадәр «Кышкы каникуллар » акциясе уза. Дәүләт автоинспекциясе бәйрәмнәр чорында юлларда балаларның иминлеген контрольдә тотуны көчәйтә. Бу хакта «Әлки хәбәрләре» хәбәр итте.

Әтнә районы Түбән Көек авылы төп гомуми белем бирү мәктәбендә истәлекле чара булган. Әлеге мәктәптә белем алган һәм махсус хәрби операциядә батырларча һәлак булган егетләр Рафаэль Әхмәдуллин, Рамил Зарипов һәм Ренат Сабиров хөрмәтенә мемориаль такта куелган. Бу хакта «Әтнә таңы» хәбәр итте.

Зәйдә Ринат Фәрдиев исемендәге ял паркында 6-7 гыйнварда Раштуа уңаеннан бәйрәм чаралары узачак. Бу хакта «Зәй-информ» хәбәр итте.