Çubarov: Qırım akimiyeti ve FSB qırımtatarlarnı saylâvlarğa kelmemesinden saqınıp qorquza

Qırımnıñ rusiyeli akimiyeti çeşit usullarnen insanlarnıñ, şu cumleden qırımtatarlarnıñ ilhaq etilgen Qırımda keçirilecek prezident saylâvlarına kelmesini temin etmeknen oğraşa. Qırımtatar Milliy Meclisiniñ reisi Refat Çubarov bunı «Amerika sesi»ne bergen intervyusında beyan etti.

 «Biz alğan malümatlarğa köre, Qırımdaki işğalci akimiyet qanunsız saylâvlarğa yüksek derecede iştirak etilmesini temin etmek maqsadınen bütün fursatlarnı qullanmağa tırışa. Hususan qırımtatar saylâvcılarına ayrı bir diqqat ayırılmaqta ve dersiñiz ki, bu sefer işğalciler qırımtatarlarından 2014 senesi «referendumında» kütleviy şekilde iştirak etmegenleriniñ acısını çıqartmaq istey», – dedi o.

Refat Çubarov ikâye etip bergenine köre, qırımtatarlarnıñ itaat etip saylâvlarğa kelmesi için hususiy hızmetler de iş yürsetmekte:

 «Akimiyet qırımtatar cemaat ve ictimaiy segmentleriniñ epsine basqı yapmaqta: Rusiye musulmanlar diniy idarersiniñ noqta-i nazarından farqlanğan baqışnı numayış etken imamlarnı FSBge çağıraraq, muqayıtlıqnen olar özleriniñ yerli cemiyetlerinden uzaqlaştırılıp, diniy faaliyetnen oğraşması tamamile yasaq etilebilecekleri aqqında tenbiyelenmekte», – dep qayd etti o.

Daa evel rusiyeli siyasetşınas, Sankt-Peterburg Avropa universitetiniñ siyasiy ve ictimaiy ilimer fakultetiniñ professorı Vladimir Gelman Qırım.Aqiqatqa bergen izaatında, Rusiye prezidentiniñ memuriyeti saylâvlarda Qırım sakinleriniñ 70% iştirak etecegini beklegeni aqqındaki fikrini beyan etken edi. ​

Rusiye prezidenti saylavlarınıñ ötkerilmesi 2018 senesi mart 18-ne – Qırım ilhaqınıñ yıllığı qayd etilgen künge tayın etildi.

Martnıñ 1-nde Yuqarı Rada BMT Telükesizlik Şurası ve Baş Assambleyası, Avropa Birligi, NATO, halqara teşkilâtlar, çetel parlamentleri ve ükümetlerini Qırımda Rusiye saylavlarınıñ qanuniyligini tanımamağa çağırdı.