Balkanly harbylar Garaşsyzlyk baýramy üçin maşklara çekilýär
Balkan welaýatyndaky harby-deňiz flotunyň we guryýer goşunlarynyň harbylary Aşgabada ugradylyp, iki aýdan bellenjek Garaşsyzlyk baýramy üçin ýörite taýýarlyklara we maşklara çekilýär. Emma harby bölümlerde esgerleriň agramy bilen bagly mesele ýüze çykdy.
Balkanly harbylaryň köpçülikleýin paýtagta ugradylmagy 27-nji sentýabrda bellenýän Garaşsyzlyk baýramyna görülýän taýýarlyklar bilen bagly. Harby parada gatnaşdyryljak esgerleri saýlamak işine aýratyn üns berilýär.
Azatlyk Radiosy bilen anonimlik şertinde söhbetdeş bolan çeşme şeýle diýýär:
"Ofiserler, esgerler we deňizçi studentler harby parada taýýarlyk üçin Aşgabadyň Bekrewe diwiziýasyna ugradyp başlandy. Harbylar esgerleriň iýmit ýetmezçiligi sebäpli aşa horlanyp, boýlary 1,80 metr uzynlykdaky esgerleriň kilesini ölçänlerinde olaryň agramy 60 kilogramdan geçmeýär".
"Medisina batalýonlarynyň lukmanlary esgerleriň tas ählisiniň agramy kadadan pes bolansoň, bu ýagdaýdan çykalga tapmaýarlar we esgerleriň agramyny galplaşdyrýarlar" diýip, ýene bir çeşme aýdýar.
"Mysal üçin 180 santimetr boýly esgeriň agramyny azyndan 75 kg edip, ýazýarlar we 55-60 kg agramly esgerleri 27-nji sentýabrda geçmeli parad taýýarlygyna ugradýarlar" diýip, çeşme deňiz-serhet goşunyndaky ýagdaýy suratlandyrdy.
Balkanly çeşmeler ýurtda her ýyl uly dabara bilen bellenýän baýramçylyklara, şol sanda harby paradlara gatnaşdyrmak üçin esger saýlamagyň birnäçe ýyl bäri problema bolýandygyna ünsi çekýärler.
"Soňky ýyllarda parada gatnaşan esgerleriň ýüzinde ýagy ýok. Hor we aç esgerleri gatnaşdyrýarlar" diýip, çeşme belleýär.
Balkan welaýatyndaky harby bölümleriň ýagdaýyndan habarly birnäçe çeşme goşunlarda azyk üpjünçiliginiň uly meselä öwrülendigini, soňky ýylda azyk ýetmezçiliginiň has hem erbetleşendigini we bu barada ýerli harby resmileriň Goranmak ministrligine ýazýan arzalarynyň wagtynda we kadaly seredilmeýändigini gürrüň berdiler.
"Bir ýyldan bäri gündelik esger ertirligi üçin 30 gramdan berilmeli mesge ýagy berilmeýär. Ýumurtga hem 6 aýdyr doly kesildi. Et bir hepde gelse, ikinji hepde gelmeýär. Esgerlere gaýnadyp çaý hökmünde berilýän gury almalar hem berilmeýär, hepdesine bir sapar garpyz berýärler ol hem ýa bişmedik, ýa-da çüýrän bolup, çykýar. Esgeriň tas ählisiniň aşgazany ýa gastrit ýa-da ýaraly" diýip, balkanly harby aýdýar.
Harbynyň sözlerine görä, tas ähli goşun bölümlerinde şol bir agyr ýagdaý.
"Esgerleriň iýmitini bugdaý ýarma, kepekli çala bişen buhanka çöregi, 3-nji sort ownuk tüwi, käte möhleti geçen, içi gurçukly bolýan halatlary hem seýrek däl. Şeýle-de etsiz çorba, kelemli ýa-da şugundyrly, ol hem ýagsyz bişýär" diýip, çeşme gürrüň berdi.
Türkmenistanda Garaşsyzlyk baýramy uly dabaralar bilen bellenýär. Birnäçe aý öňünden başlanýan taýýarlyklara ilatyň ähli gatlaklary köpçülikleýin çekilýär. Döwlet baýramçylyklarynda, şol sanda Garaşsyzlyk güni geçirilýän harby paradlarda döwrebap tehnikasynyň dürli görnüşleri, harbylaryň we esgerleriň müňlerçesi görkezilýär.
"Türkmenistan harby kuwwatyny görkezmek üçin parad geçirýär. Emma aç esgerleri göreniňde buýsanmagyň deregine, rehimiň gelýär. Üstesine, esgerler Bekrewede 2 aýlap, her gün 15 sagatlap dynuwsyz dabaraly ýöriş maşklaryna gatnaşýarlar. 45 gradus gyzgyn günüň aşagynda maşk edýän esgerlere bu agyr zähmeti üçin goşmaça iýmit hem berilmeýär. Keselleýän we heläk bolýan esgerler hem bolýar" diýip, harby maşklaryň geçişinden habarly çeşme gürrüň berdi.
Türkmenistanyň hökümeti harbylaryň üpjünçiligini gowulandyrmagy ileri tutýan meseleleriň arasynda agzap, ýaragly güýçleriniň maddy-tehniki ýagdaýyna üns berilýändigini aýdýar. Daşary ýurtlardan täze harby enjamlar we ýaraglar satyn alynýar. Emma ýaragly güýçlerdäki problemalar ne hökümet, ne-de döwlet mediasy tarapyndan agzalýar.
Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.
Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPN ulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.