Türkmen ÝOJ-larynyň uçurymlary diplomlaryny ilkinji gezek iki ýyl işlemän alýar
Türkmenistanyň prezidentiniň 23-nji iýunda gol çeken kararyna laýyklykda, Orta hünär we ýokary hünär bilimi edaralarynyň uçurymlaryny işe ýollamagyň Düzgünnamasyna üýtgetmeler we goşmaçalar girizildi.
Şeýle-de, Serdar Berdimuhamedowyň şu ýyl okuwlaryny üstünlikli tamamlan, Aşgabatdan we Ahal sebitinden bolan uçurymlary Arkadag şäherine işlemäge ibermek baradaky karara gol çekendigi habar berilýär.
Arkadag şäherine döwlet ähmiýetli şäher diýen aýratyn hukuk ýagdaýynyň berilmegi bilen, şäheriň edaralarynyň, guramalarynyň we kärhanalarynyň öňünde goýlan wezipeleri ýokary hilli amal etmek, işgärler köpçüliginiň üstüni yzygiderli ýetirmek maksady bilen, Ahal welaýatyndan we Aşgabat şäherinden ýurdumyzyň orta hünär we ýokary okuw mekdeplerini üstünlikli tamamlaýan uçurymlary Arkadag şäherine işe ýollamak göz öňünde tutulýar diýip, TDH habar berdi.