Maryda ýaşaýjylaryň gaz, suw turbalary barlanyp, olara gaz peçlerini ulanmagyň gadagandygy duýdurylýar
Ýurduň Içeri işler ministrliginiň Ýangyn howpsuzlygy gullugy tarapyndan ilberilen SMS-lerde öňümizdäki günlerde howanyň temperaturasynyň -16 gradusa çenli ýetjekdigi duýdurylýar.
Bu aralykda, Mary, Baýramaly we Ýolöten şäherlerinde Ýangyn howpsuzlygy gullugynyň işgärleri ýaşaýjylaryň öýlerine aýlanyp, olaryň gaz turbalaryny barlaýarlar.
"Gullugyň işgärleri ýaşaýjylardan gaz peçleri ulanmagyň gadagandygy baradaky duýduryş hatyna gol çekmegi talap edip, hatyň bir nusgasyny goýup gidýärler" diýip, Azatlyk Radiosynyň habarçysy 11-nji ýanwarda gürrüň berdi.
Ýerli ilat köp gatly ýaşaýyş jaýlaryndaky merkezi ýyladyş ulgamynyň kadaly işlemeýändigini belläp, öýleri ýylytmak üçin gaz we elektrik peçlerinden peýdalanmaga mejbur bolýandygyny aýdýar.
"Şu günler köp adam tok peçlerini ulanýar. Bu bolsa, elektrik simleriniň gyzyp, jaýlardaky razetkalaryň eremegine getirýär. Käte uçgun çykyp, ot çykýar. Köplenç bir girelgedäki jaýlaryň ählisiniň togy öçýär. Elektrik edarasynyň ilatyň tok üpjünçiligini iki-üç gün soň dikeldýän ýagdaýlary hem bolýar" diýip, maryly ýaşaýjy anonimlik şertinde aýtdy.
Mundan başga-da, Ýaşaýyş jaý müdirliginiň işgärleri köp gatly jaýlaryň ýerzeminlerine aýlanyp, merkezleşdirilen ýyladyş ulgamy üçin niýetlenen suw turbalaryny barlaýarlar.
"Haýsydyr bir turbadan suw syzýan bolsa, onda ol turba rezin dolap daňyp goýýarlar. Müdirligiň işgärleri 'Indiki ýyla çenli mydar edip dursa bolýar. Turbalary çalyşmak üçin elimizde hiç bir zat ýok, hatda köne turba-da galmady. Bu ýeri paýtagt Aşgabat däl' diýýärler" diýip, ýaşaýjy belledi.
Işgärler ýaşaýjylara sowuk howanyň täsirlerine garşy özbaşdak göreşmegi maslahat berýärler. Olar suw we gaz turbalarynyň ýeriň üstünden geçýän bölekleri paket ýa-da keçe bilen örtülse, kem bolmajakdygyny hem aýdýarlar.
"Hökümetimiziň bu zatlara seretmäne, serişde goýbermäge güýji ýok. Bulary özleriňiz etseňiz gowy bolardy" diýip, ýaşaýjy müdirligiň işgäriniň sözlerini sitirledi.
Mundan başga-da, uly ýollardaky köprüleriň gyralarynda halta gaplanan sary çäge goýulýar. Sebit resmileri bulary doňan ýollara sepmegi göz öňünde tutýarlar.
"Jemagat hojalygy müdirliginiň işgärlerine-de şu hepde howanyň aşa sowuk boljakdygy duýduryldy. Şeýle-de, işgärlere galyň geýinmek maslahat berildi. Olara islendik ýagdaýa taýyn bolmalydyklary duýdurylyp, işe gelenlerinde öz ýanlary bilen pil, bedre ýaly gurallary getirmelidigi hem aýdyldy" diýip, müdirligiň bir işgäri anonimlik şertinde aýtdy.
Azatlyk bu aýdylanlar barada sebitiň Ýangyn howpsuzlygy gullugyndan we Jemagat hojalygy müdirliginden goşmaça maglumat alyp bilmedi.
Şu hepdäniň başynda Türkmenistanyň çäklerine aşa sowuk howa aralaşdy. “Meteožurnal” neşiri 5-nji ýanwarda beren habarynda ýurtda şu hepdäniň başyndan anomal sowuk howanyň bolmagyna, howanyň derejesiniň käbir ýerlerde adaty klimat kadalaryndan 10-16 gradus aşak gaçmagyna garaşylýandygy aýdyldy.
Türkmen metbugaty adatça adamlaryň durmuşyna täsir ýetirjek güýçli howa üýtgemeleri barada öňünden anyk maglumat bermeýär. Emma bu gezekki aşa sowuk howa, şol sanda ýurtda ýagjak agyr gar “Watan” habarlar programmasynda hem agzaldy. Onda şu hepde Maryda howanyň temperaturasynyň gijelerine -12 we -17, gündizlerine -6 we -11 gradusa çenli ýetjekdigi aýdyldy.
Türkmenistanda güýz-gyş pasyllarynda, hususan-da aşa sowuk howada ýaşaýjylaryň ýyladyş ulgamlarynda bökdençlikler ýygy-ýygydan ýüze çykýar. Şeýle ýagdaýlar soňky gezek geçen ýylyň dekabr aýynyň başynda bolupdy.
Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.
Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPNulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.