Koronawirus möwjemeleriniň gyrasynda duran Tokioda Olimpiýa oýunlary başlanýar
Oýunlaryň resmi açylyş dabarasy ýerli wagt bilen sagat 20:00-a planlaşdyryldy (Pragada sagat 13:00) we onuň, dünýäde 4 milliondan gowrak adamy öldüren, 192 milliondan gowrak adama ýokuşan koronawirus ýagdaýy sebäpli, öňki ýyllardaky olimpiýa açylyşlary ýaly dabaraly bolmagyna garaşylmaýar.
Guramaçylar bu dabara barada jikme-jik maglumat bermediler, ýöne olar berk koronawirus düzgünleriniň girizilmegi netijesinde, 68,000 adamlyk Olimpiýa stadionynda guralýan dabarada diňe 950 adamyň boljakdygyny we oňa diňe 15 töweregi dünýä lideriniň gatnaşjakdygyny aýtdylar.
Türkmenistan Olimpiýa oýunlaryna wise-premýer Serdar Berdimuhamedowyň ýolbaşçylygyndaky delegasiýany ugratdy.
Tokioda koronawirus ýokuşmalarynyň derejesiniň ýokarlanmagyna garşy täze adatdan daşary ýagdaý yglan edilenden soň, guramaçylar iki hepde ozal tomaşaçylaryň çärelere gatnaşmagyny düýbünden gadagan etmek kararyna geldiler. Tokio 22-nji iýulda 1,979 täze ýokaşmanyň bardygyny habar berdi, bu 15-nji ýanwardan bäri wirus ýokuşmasynyň iň ýokary derejesi bolup durýar. Olimpiýa oýunlaryna akkreditlenen 90-a golaý adam, oňa gatnaşýan türgenler hem oňyn synag geçirdi.