Gyrgyzystanyň Goranmak geňeşiniň ozalky sekretarynyň tussag edilmegi boýunça höküm çykaryldy
Içeri işler ministrligiň metbugat wekili Karima Amankulowanyň Azatlyk Radiosyna beren maglumatyna görä, 15-nji iýulda Tabaldiýewiň ady gözlenýän şahsyýetleriň sanawyna goşulypdyr. Amankulowa onuň häzir nirede ýaşaýandygynyň belli däldigini sözüne goşdy.
Amankukowanyň bellemegine görä, Tabaldiýew mundan alty ýyl ozal ýakasy belli jenaýatçy Aziz Batukaýewiň türmeden “bikanun ýagdaýda möhletinden ir azat edilmegi” bilen baglylykda şübhelenýär.
Şu ýylyň maýyndan bäri Batukaýewiň azat edilen döwri häkimiýet başynda bolan ençeme ýokary derejeli gyrgyz resmisi, şol sanda premýer-ministriň ozalky orunbasary, ozalky saglyk ministri, ozalky baş prokuror hem meňzeş aýyplamalar esasynda tussag astyna alyndy.
2013-nji ýylda Batukaýew leýkemiýa keseli sebäpli möhletinden ir azatlyga goýberilipdi. Soňy bilen bu saglyk diagnozynyň galplaşdyrylandygy belli boldy.
Etnik çeçen Batukaýew 2006-njy ýylda 17 ýyl türme möhletine höküm edilipdi. Oňa ençeme jenaýat işi boýunça, şol sanda gyrgyz kanunçykaryjysynyň we Içeri işler ministrliginiň resmisiniň öldürmegine ilteşikli bolmakda aýyplama bildirilipdi.
Türmeden azat edileninden soň, Batukaýew dessine Russiýanyň Çeçenistan regionyna aşdy.