Борис Ҷонсон: "Фармони заҳролуд кардани Скрипалро Путин додааст"
Вазири умури хориҷии Британия Борис Ҷонсон гуфт, ки истифодаи гази фалаҷкунандаи асаб дар қаламрави шоҳигарии Британия, эҳтимол бо фармони президенти Русия Владимир Путин сурат гирифтааст. Дар ин бора Reuters рӯзи 16 март бо такя ба изҳороти вазир хабар дод.
"Мо ба Русия мухолифате надорем. Ҳодисае, ки рух дод набояд мояи русбадбинӣ шавад. Ихтилофи мо бо Путин в Кремл аст ва ба назари мо ба эҳтимоли зиёд истифодаи гази фалаҷкунандаи асаб дар Британия, давлати аврпуоӣ, барои нахустин бор аз замони Ҷанги дуюми ҷаҳонӣ фармони Путин буд",- гуфт Борис Ҷонсон.
Рӯзи 4 март Сергей Скрипал, ҷосуси пешини Идораи истихбороти кулли Русия ва духтари ӯ Юлия дар шаҳри Солсберӣ аз гази фалаҷкунандаи асаб заҳролуд шуданд. Вазъи онҳо бисёр вазнин арзёбӣ мешавад. Сергей Скрипал соли 2004 бо ҷурми ҷосусӣ ба фоидаи Британия зиндонӣ шуд. Соли 2010 ӯро бо агентҳои рус, ки Амрико боздошт карда буд, иваз карданд.