Ҷасади корманди “Лотоспорт” аз оғилхона пайдо шуд
Ҷасади овехтаи Абдулмалик Ғафурови 50-сола, сокини деҳаи Себи сурхи ҷамоати Ватани Фархорро наздиконаш рӯзи чаҳоршанбеи 7-уми март аз оғилаш пайдо карданд. Абдулмалик Ғафуров то лаҳзаҳои маргаш дар ширкати “Лотоспорт” дар маркази ин ноҳия кор мекард.
Як манбаъ аз мақомоти интизомии Фархор рӯзи 9-уми март дар сӯҳбат ба Радиои Озодӣ гуфт, ки ҷасади ин сокини Себи сурхро наздиконаш аз оғилхонааш пайдо карданд, аммо ҷои ҳодиса мактаби деҳа будааст, зеро ба қавли манбаъ, дар ҳавлии мактаб осори хун мушоҳида шудааст. Манбаъ афзуд, ки ташхиси таббӣ-судӣ дар бадани ин шахс 12 захми кордро ошкор кардааст.
"Ин ҳодиса рӯзи 7-уми март рух додааст. Ҳоло дақиқ нест, ки дар инҷо чӣ гузаштааст, вале додситонии ноҳия парванда боз кардааст, тафтишот идома дорад, зеро мурдаашро аз оғили хонаашон пайдо карданду ҷои ҳодиса бошад мактаб аст, ки дар онҷо аз ҷои корд, хун чакидааст."
Аз додситонии ноҳияи Фархор низ дар сӯҳбат бо Радиои Озодӣ низ таъйид карданд, ки ҳоло нисбати ин ҳодиса парвандаи ҷиноӣ оғоз шуда, тафтишот идома дорад. Яке аз саволҳое, ки ба он тафтишот бояд посух диҳад, ин аст, ки то куҷо куштор ба кори Ғафуров дар қиморхонаи "Лотоспорт" рабт мегирад ё на.
Илҳом Қуватов, раиси ҷамоати Ватани ноҳияи Фархор дар сӯҳбат ба Радиои Озодӣ аз Абдумалик Ғафуров тавсиф кард ва гуфт, ки ин хонавода дар деҳоти Себи сурх (30-солагии собиқ) оилаи намунавӣ буданд ва яке аз бародаронаш низ раиси ҳамин деҳот аст.
Хонаводаи Абдумалик Ғафуров намехоҳанд дар ин маврид сӯҳбат кунанд. Аз ин хонавода гуфтанд, ки тафтишот муайян хоҳад кард, ки дар ин кор кӣ даст дорад.
Ҳодисаи қатли ин сокини Фархор дар ҳолест, ки рӯзи 20-уми феврал дар кӯчаи Чармгарони Поёни Кӯлоб ду бародар сокини ин шаҳр Бахтиёр Раҷабови 34-соларо ба иллати хусумати шахсӣ куштанд. Аз ин қабл, дар моҳи майи соли гузашта ба ҷони Муҳиддин Юлаев, корманди 25-солаи Кумитаи давлатии амнияти миллии Тоҷикистон дар маҳалли Исмоили Сомонии шаҳри Кӯлоб сӯиқасд сурат гирифт ва ӯро бо 24 зарби корд маъюб карданд. Баъдан Вазорати корҳои дохилӣ хабар дод, ки як гурӯҳро бо гумони ҳамла ба Юлаев боздошт карданд.
Ҳукми ин афрод бегоҳи 10-уми октябр содир шуд. Додгоҳи минтақаи Кӯлоб Ҷамолиддин Камолов ва Азамати Собир, ду нафареро, ки аз онҳо ҳамчун ташкилкунандаи ҳамла ном мебаранд, ба 18 соли зиндон маҳкум кард. Комил Тоштемуров ва Наврӯз Розиқов, ки дар ин ҳамла шарик буданд, ба 17 соли зиндон маҳкум шуданд. Тоҳир Тоштемиров ва Сайфиддин Юсупов барои шарикӣ дар ҷиноят 16 сол равонаи зиндон шуданд.