Сафорат дар Қазоқистон: Дар автобуси шикаста 49 шаҳрванди Тоҷикистон буд

Сафорати Тоҷикистон дар Қазоқистон гуфт, барои кӯмак ба 49 шаҳрванди ин кишвар, ки  савори автобус аз Ектеринбург ба ватан дар як шоҳроҳи вилояти Акмолаи Қазоқистон  дармонданд, намояндагони ҷамъияти тоҷикон дар ин маҳалро сафарбар кардааст.  Як намояндаи консулгарии  Тоҷикистон дар Қазоқистон рӯзи 7 март ба Радиои Озодӣ гуфт, ки дар ҳақиқат  бар асари хароб шудани муҳаррики автобус муҳоҷирони кории савори он дар нимаи рӯзи сешанбе дар вилояти Акмола дармонданд. Дар миёни онҳо занҳову кӯдакон низ мебошанд.

Дипломати тоҷик, ки нахост номаш нашр шавад,  гуфт, ки масъулони сафорат дар навбати аввал аз ҷамъияти тоҷикони Акмола хостааст ба кӯмаки мусофирон бишитобанд ва дар пай тадбирҳои дигари зарурӣ ҳам андешида мешавад. 

Ҳодиса шоми 6 март рух дод ва гуруҳи наҷотбахшони марбут ба ҳукумати вилояти Акмола дар ҷои ҳодиса авал шуда ба ёрии мусофирон шитофтанд. 

Роҳи мошингарди Тоҷикистон-Русия, ки аз қаламрави Қирғизистону Қазоқистон мегуразарад, як масири маъмули ҳаракати муҳоҷирони тоҷик мебошад. Аз ин роҳ онҳое истифода мекунанд, ки барои пардохти харҷи роҳи ҳавопаймову қатори роҳи оҳан имкони молӣ надоранд.

Тафсилоти ин ҳодиса боз нашр мешавад 

Вале бисёр ҳолатҳое шудааст, ки бо сабаби риоя накардани меъёрҳои бехатарӣ, аз ташхсини техникӣ нагузаштани автобусҳои мусофирбаре, ки дар байни кишварҳои ҳаракат мекунанд, фоҷеа сар мезанад. 

Мудҳиштарин ҳодиса 18-уми январи соли ҷорӣ рух дод. Автобуси навъи “Икарус”, ки  аз ҳудуди деҳаи Калибои вилояти Оқтеппаи Қазоқистон дар шоҳроҳи Шимкент-Самара ба самти Русия ҳаракат мекард, аз дохил оташ гирифт. Дар натиҷаи "тамоси барқӣ" дар дохили автобус тамоми ин мусофирбар оташ гирифт ва дар они воҳид 52 нафар -- аксар шаҳрвандони Узбакистон ба ҳалокат расида, танҳо панҷ нафар – ду муҳоҷири узбак ва се шаҳрванди Қазоқистон бо ҷароҳатҳои мухталиф ба бемористон интиқол ёфтанд.