Veteranët e UÇK-së dhe Qeveria pa darkordim për ngritjen e pensioneve

Përfaqësuesit e organizatave të veteranëve të Ushtrisë Çlirimtare të Kosovës (OVL-UÇK) dhe Qeveria e Kosovës nuk janë darkorduar lidhur me pensionet për veteranët.

Përfaqësuesit e OVL UÇK-së u takuan të premten me kryeministrin e Kosovës, Albin Kurti dhe me ministrin e Financave, Hekuran Murati.

“Me kryeministrin nuk u darkorduam pasi ne kërkuam që të kthehet pika 3.1, që kjo Qeveri me Kuvendin e Kosovës e kanë ndryshuar, që me atë pikë e kanë larguar benificionin e veteranit të luftës që është me ligj që nuk mund të jetë më pak se paga minimale”, tha pas takimit, Faton Klinaku, ushtrues detyre i kryetarit të OVL të UÇK-së.

Kuvendi i Kosovës më 14 qershor ka miratuar në parim projektligjin për rritjen e pagës minimale në 250 euro neto.

Por, në pikën 3.1 thuhet se për pensionet e veteranëve – që aktualisht kapin vlerën e 170 eurove – deri në kategorizimin e listës përfundimtare të veteranëve, Qeveria do të vendosë për lartësinë e shumës së pensioneve.

Shoqatat e veteranëve kanë organizuar dy protestat deri më tani, duke kërkuar që pensionet e tyre të jenë në lartësinë e njëjtë me atë të pagës minimale.

Protesta e 16 qershorit të veteranëve, të mbajtur para Kuvendit të Kosovës, u mbështet edhe nga partitë opozitare Partia Demokratike e Kosovës dhe Aleanca për Ardhmërinë e Kosovës, që pamundësuan vazhdimin e seancës plenare ku ishte paraparë të diskutohej për tërheqjen e mjeteve nga Fondi i Kursimeve Pensionale.

Klinku tha se Kurti u ka thënë se do t’iu ofrojë disa propozime me shkrim veteranëve.

Ai tregoi se kryeministri argumenton se pensionet e veteranëve nuk janë rritur duke u thirrur në numrin e madh të listës së veteranëve.

Në Kosovë, aktualisht është në proces gjyqësori rasti i njohur si “Veternët”, rast në të cilin dyshohet se mbi 19,000 persona kanë fituar në mënyrë të paligjshme statusin e veteranëve.

Klinaku tha se “fryrja e listës së veteranëve” nuk është çështje që i takon Kurtit, “por është çështje e gjykatës dhe duhet pritur procesi gjyqësor qoftë për verifikim, qoftë edhe për kategorizim”, duke paralajmëruar se do të mbajnë protesta derisa Qeveria të rikthejë pikën 3.1 të projektligjit për pagën minimale.

Aktualisht, sipas të dhënave zyrtare nga Qeveria e Kosovës, statusin e Veteranit Luftëtar e kanë 53,188 persona, kurse, sipas të dhënave të Agjencisë së Statistikave të Kosovës, 37,006 janë përfitues nga skema për veteranët e luftës.