د اسراییلو او حماس ډلې اوربند د ۲ ورځو لپاره تمدید شو
د قطر د بهرنیوچارو وزارت ویاند مجید الانصاري پر خپله اېکس پاڼه( پخواني ټویټر) په یوه بیان کې دا خبر ورکړی دی چې ورسره دا هیلې هم ټوکېدلي چې ښايي د غزې په خونړۍ جګړه کې د اوږدې مودې په مخه اوربند وشي او نور اسراییلي یرغمل او فلسطیني بندیان خوشې شي.
قطر د متحدو ایالتونو او مصر ترڅنګ د حماس او اسراییلو ترمنځ په خبرو کې منځګړتوب کوي.
له دې اعلان وروسته حماس ډلې هم تایید کړه چې د دوو ورځو په مخه د اوربند د غځولو شرایط یې منلي دي.
اسراییلو ویلي دي چې د هرو لسو اسراییلي برمته وو د خوشې کېدو په بدل کې به اوربند د یوې بلې ورځې لپاره وغځوي، خو په عین حال کې یې ټینګار کړی چې د حماس ډلې د پوځي وړتیاوو د ځپلو لپاره پر خپله ژمنه ولاړ دی.
اسراییلو وروسته له هغه په غزه کې پوځي عملیات پیل کړل چې حماس د اکتوبر پر اوومه نېټه پر اسراییلو برید وکړ، ۱۲۰۰ کسان یې ووژل او شاوخوا ۲۴۰ تنه نور یې برمته کړل.