یوناما: د نجونو زده کړو په اړه د طالبانو نظرونه همغږي نه دي
د اتم ټولګې زده کوونکې مرسل، چې د ښوونځيو د بندېدو د پرېکړې دوام يې د زده کړو هیله ورځ تر بلې مړاوې کوي.
هغه وايي، د طالبانو حکومت په کور پاتې کړه او په کور جبري پاتې کېدل ورته د یو بندې په څېر احساس ورکوي.
مرسل وویل: "دلته کور د زندان په څېر دی، هغه ښوونځی، هغه خوبونه، هغه څه چې ما درلودل، دا ټول مې د اسلامي امارت د یوې خبرې له امله هېر کړل، نن زموږ کور د زندان په څېر دی، په رښتیا هم ډېره مایوسه شوې یم."
مرسل طالبان د زده کړو په برخه کې د روان حالت مسوولین بولي.
خو د افغانستان لپاره د ملګرو ملتونو ځانګړې استازې دیبورا لاینز له شپږم ټولګي پورته د نجونو د ښوونځیو بېرته پیلېدو ته هیله منه ده.
اغلې لاینز په دې اړه د طالبانو د مشرتابه له غړو سره څو ځلې لیدنې کړې دي.
اغلې لاینز تازه د سی این این سره په یوه مرکه کې ویلي، هغه د یو شمېر طالب مشرانو په باور له شپږم ټولګي څخه پورته د نجونو د ښوونځیو د بیا پرانیستلو لپاره هیله منه کړې ده.
د ملګرو ملتونو ځانګړې استازې دغه شان ټینګار وکړ، چې طالبان لا هم د دې نظر په همغږي کولو نه دي بریالي شوي.
هغې زیاته کړه: "ځينې یې په ښکاره ډول په دې باور دي، او موږ د طالبانو له ډېرو مشرانو څخه اورېدلي او هیله من شوې یو، خو د هغوى نظرونه لا هم همغږي نه دي چې نجونې دې بيا ښوونځيو ته ولاړې شي، بناً دوی د یوه حاکمیت تر چتر لاندې، یو واحد نظر او کلي توافق ته نه دي رسېدلي."
طالبانو په دې اړه زموږ پوښتنو ته ځواب ونه وایه خو تر دې وړاندې د طالبانو د حکومت د پوهنې وزارت ویلي وو، چې د دوی د مشرتابه له لوري د نجونو د ټولو ښوونځیو د پرانیستلو په اړه د حکم په تمه دي.
خو دا باور د نجونو د ښوونځیو د ځینو ښوونکو لپاره د تېر ایستلو نه پرته بل څه نه دي.
دوی د د طالبانو په واکمنۍ کې د ښځو او پوهې د موضوع په اړه د شک په نظر ګوري.
یوه ښوونکي، چې د موضوع د حساسیت له امله یې نه غوښتل نوم يې په دې راپور کې خپور شي، ازادی راډیو ته وویل: "دوی کولای شي چې په خپل منځ کې سره کېني، همغږي وکړي او پرېکړه وکړي چې د نجونو لپاره بېرته ښوونځي پرانېزي، همدارنګه، پر ښځو بندیزونه کم کړي، اما دوی اصلاً نه غواړي چې دا کار وکړي."
د طالبانو حکومت له میاشتو راهیسې له شپږم ټولګیو د پورته نجونو ښوونځي تړلي دي.
تر اوسه هیڅ کوم کورني او بهرني احتجاج په دې برخه کې د طالبانو د حکومت لخوا کوم مثبت ځواب نه دی ترلاسه کړی، که څه هم د طالبانو د کورنیو چارو سرپرست وزیر سراج الدین حقاني وړاندې له سي این این سره په خبرو کې ویلي وو، چې د نجونو د ټولو ښوونځیو د بیا پرانیستل کیدو په اړه ښه خبرونه په لاره دي، خو هغه څه چې لا تر اوسه هم د یوې خبرې تر حده پاتې ده.