امريکا: که طالبان پر خپلو پرېکړو بيا کتنه ونه کړي فشارونه به پرې زيات شي
د امریکا د بهرنیو چارو وزارت ویاند نېدپرایس پرون خبریالانو ته وویل چې دا موضوع یې له طالبانو سره هم شریکه کړې.
هغه زیاته کړه چې له امریکا سره داسې وسایل شته چې که پر نجونو او ښځو لګېدلي محدودیتونه لیرې نه شي عملي به یې کړي خو ښاغلي پرایس په دې اړه جزییات ورنه کړل.
د طالبانو حکومت د شنبې په ورځ هغه فرمان اعلان کړ چې د ښځو حجاب جبري کوي او ښځو ته له اړتیا پرته له کوره د وتلو اجازه نه ورکول کېږي.