د ازبکستان زرګونه ټنه مرسته پرون افغانستان ته ورسېده
ازبک چارواکو طالبانو ته د دغو مرستو د تسلیمولو پر مهال وویل چې هېواد یې له اړمنو افغانانو سره لا همکاریو ته چمتو دی.
دا مرستې تر حیرتانه په ریل ګاډي کې راوړل شوې او طالب چارواکو ته وسپارل شوې.
د طالبانو د حکومت ویاند ذبیح الله مجاهد د دغو مرستو د ترلاسه کولو پر مهال رسنیو ته وویل: "تر څلورو زره ټنو مختلف مواد دي. ۵۸ واګونونه دي چې له ارتزاقي موادو ډک دي پکې اوړه شته، غواړي، وریجې همدا راز دارو درمل او واکسین هم پکې شامل دي. د دغو موادو مرسته شوې ده."
په بلخ کې د طالبانو چارواکو ویلي چې دمګړۍ دوی دا مرسته په اړمنو، بې ځایه شویو کورنیو او نورو مستحقو کسانو باندې ویشي.
د طالبانو د حکومت چارواکو د سیمې په نورو هېوادونو هم غږ وکړ چې له اړمنو افغانانو سره د مرستې لپاره را ودانګي.
د ازبکستان چارواکو د دغو مرستو د تسلیمولو پر مهال وویل چې دولت یې له اړمنو افغانانو سره د مرستې لپاره متعهده دی او په راتلونکي کې به ورته نورې مرستې هم کوي.
د راپورونو پر اساس د طالبانو له بیا واکمنېدو راهیسې ازبکستان دوه واره مخکې هم له افغانانو سره د خوراکي او غیر خوراکي موادو مرسته کړې ده.
ازبکستان داسې وخت له اړمنو افغانانو سره مرسته کړې چې د راپورونو پر اساس د افغانستان نیمايي وګړي له ۲۳ میلیونو زیات کسان له لوږې سره مخ دي.
د ملګرو ملتونو سازمان ګواښ کړی چې که د اړمنو لاسنیوی په وخت ونه شي نو یو انساني ناورین به رامنځته شي.