د پنجشیر جګړه ۵مې ورځې ته وغځېده؛ دواړه لوري یو بل ته د مرګ ژوبلې ادعا لري
د پنجشیر جګړه پنځمې ورځې ته وغځېده. طالبان وايي، په پنجشیر ولایت يې له څلورو خواوو برېدونه پیل کړي او مقابل لوري ته یې درنه مرک ژوبله اړولې ده.
د طالبانو د مطبوعاتي دفتر غړي بلال کریمي نن جمعه ازادي راډيو ته وویل چې د دوی ځواکونه د څلورو خواوو پنجشیر ته ننوتي او د تېرې شپې راهیسې يې له مقابل لوري ډېرې سیمې نیولې دي.
کریمي زیاته کړه: "بلې، پنجشیر ولایت ته د اسلامي امارت مجاهدین له ګڼو استقامتونو څخه داخل شوي دي، تېره شپه مجاهدینو د پنجشیر ولایت پر ختیځ پریان ولسوالۍ د بدخشان او تخار ولایت له لوري بریدونه کړي دي، دښمن ته زیات تلفات اوښتي، زموږ د راپورونو پر بنسټ هلته د دښمن شااوخوا ۲۵ کسان وژل شوي او ډېر شمېر نور یې ټپیان شوي."
د ښاغلي کریمي په خبره، د پنجشیر ولایت د نیولو لپاره له بدخشان، تخار، نورستان او بغلان ولایتونو څخه هم طالبان ورغلي دي.
خو په ورته وخت کې په پنجشیر ولایت کې د ملي مقاومت جبهې ویاند فهیم دشتي بیا رسنیو ته په استول شوي پیغام کې ويلي چې طالبانو ته یې درنه مرک ژوبله اړولې ده.
ښاغلي دشتي زیاته کړه: "په تېرو څلور ورځو کې دښمن ته باید دا ثابته شوي چې د جګړې له لارې دا مساله نه حلېږي، په تېرو څو ورځو کې د طالبانو شااوخوا ۳۵۰ کسان وژل شوي او شااوخوا ۲۵۰ نور ټپیان شوي، ۳۵ کسان یې اسیر شوي دي او ګڼ شمېر مهمات او نقلیه وسایط ویجاړ شوي دي."
ښاغلي دشتي د طالبانو دا ادعا هم رد کړه چې ګوندې طالبان د بنجشیر ولایت ځینو سیمو ته ورننوتي وي.
په پنجشیر ولایت کې جګره هغه مهال پیل شوه چې پنځه ورځې مخکې د دواړو خواوو مذاکراتي پلاو خبرو پایله ورنه کړه.
طالبانو مخکې ویلي وو، هڅه کوي د پنجشیر مساله د خبرو له لارې حل کړي، خو وروسته بیا داسې راپورنه خپاره شول چې دغه خبرو پایله نه ده ورکړې.
که څه هم په پنجشیر ولایت کې د جګړې دواړه خواوې د پرمختګ خبره کوي، خو خلک او یو شمېر هېوادونه په سوله ییز ډول د دغه مسالې حل غواړي.