Gull i sin internasjonale debut
14 år gamle Quan Hongchan frå Kina hadde aldri deltatt i ein internasjonal stupekonkurranse før kvalifiseringa i Tokyo. Torsdag tok ho eit suverent OL-gull.
Det var venta at gullkampen i tårnstup ville stå mellom Chen Yuxi og Quan. Dei to kinesarane hadde vore klart best i både kvalifisering og semifinale, men i finalen var det aldri tvil.
14 år gamle Quan låg likt med si eitt år eldre lagvenninne etter det første stupet, men utklassa henne i alle dei fire siste.
To gonger fekk ho toppkarakteren 10 av alle dei sju dommarane, og hennar fire siste stup gav frå 95,7 til 96 poeng.