ათენის ჩრდილო-დასავლეთით ტყის ხანძარი მძვინვარებს, იწვის სახლებიც
საბერძნეთში, ათენის შემოგარენში 17 ივლისის შემდეგ ტყის ხანძრის ჩაქრობას ცდილობენ მეხანძრეები. ძლიერი ქარი ცეცხლის ჩაქრობას ართულებს და ახალ კერებს აჩენს.
18 ივლისის საღამოს მონაცემებით, რომელსაც Reuters-ი აქვეყნებს, ხანძარი დაახლოებით 8 კილომეტრის (5 მილის) სიგრძის ტერიტორიაზეა გავრცელებული. ხელისუფლებამ ხანძრის სიახლოვეს მცხოვრები 300-მდე ადამიანის ევაკუაცია განახორციელა. ძლიერი ხანძრის გამო ბრიუსელში ოფიციალური ვიზიტი შეწყვიტა და საბერძნეთში დაბრუნდა პრემიერ-მინისტრი კირიაკოს მიცოტაკისი.
ხანძრის ჩაქრობის სამუშაოებში ჩართულია 250 მეხანძრე, 75 სახანძრო მანქანა, 11 თვითმფრინავი და 9 ვერტმფრენი. ბერძენი მეხანძრეების დასახმარებლად საფრანგეთმა და იტალიამ 18 ივლისს ათენში გაგზავნეს ხანძრის საწინააღმდეგო 4 თვითმფრინავი.
ევროპის ქვეყნებში და მათ შორის საბერძნეთშიც, ერთ კვირაზე მეტია უჩვეულოდ მაღალი ტემპერატურა ფიქსირდება, ათენში კვირას დაიკეტა აკროპოლისიც, რათა შეეზღუდათ ადამიანების გადაადგილება დღის განმავლობაში ქალაქში.