მთავრობამ ანაკლიის პორტის მშენებლობაზე ინტერესთა მოწვევის გამოცხადებაზე თანხმობა გასცა
ეკონომიკის მინისტრმა, ვიცე-პრემიერმა ლევან დავითაშვილმა მთავრობის ადმინისტრაციის ტრიბუნიდან ილაპარაკა ანაკლიის ღრმაწყლოვანი პორტის პროექტის შესახებ. მისი თქმით, დღეს, 12 სექტემბერს, საქართველოს მთავრობამ თანხმობა მისცა ეკონომიკისა და მდგრადი განვითარების სამინისტროს და სსიპ „ანაკლიის ღრმაწყლოვანი ნავსადგურის განვითარების სააგენტოს“, რათა მათ გამოაცხადონ ინტერესთა მოწვევა ანაკლიის ღრმაწყლოვანი პორტის აშენების თაობაზე.
„მთავრობის გადაწყვეტილებით განისაზღვრა ანაკლიაში ღრმაწყლოვანი ნავსადგურის მშენებლობის ოპერირების და გადმოცემის შესახებ საჯარო და კერძო თანამშრომლობის პროექტის განხორციელების ეტაპები, - განაცხადა მინისტრმა და დაამატა, - ჩვენ გვჭირდება, რომ შერჩევის პირობები იყოს მაღალ დონეზე მომზადებული და აქედან გამომდინარე, მთავრობამ მიიღო გადაწყვეტილება, სამინისტროს მიეცეს საშუალება, მაღალი კვალიფიკაციის მქონე საერთაშორისო საკონსულტაციო ჯგუფი ან ჯგუფები დავიქირაოთ ამ პროცესში მონაწილეობისთვის".
როგორც ლევან დავითაშვილი ამბობს, უკვე ჩატარებულია მაღალი დონის საპროექტო სამუშაოები, რომლებიც ავტორიტეტულმა ნიდერლანდურმა კომპანიამ MTBS-მა განახორციელა. მინისტრის თქმით, მათ განაახლეს მანამდე არსებული კვლევები მსოფლიოში მიმდინარე ახალი გარემოებებისა და პროცესების გათვალისწინებით, ასევე მოამზადეს საქართველოს სანავსადგურე სექტორის კვლევა და რეკომენდაციები.
„ვფიქრობ, რომ დღეს ხელთ გვიჭირავს ყველა ის ინფორმაცია, რომელიც საშუალებას მოგვცემს, სწორად ჩამოვაყალიბოთ პირობები და ასევე შევარჩიოთ სათანადო პარტნიორი პროექტის განვითარებაში. ჩვენ ვფიქრობთ, რომ ასევე ძალიან მნიშვნელოვანია, სწორად განისაზღვროს პროექტის განხორციელებაში სახელმწიფოს ანუ საჯარო მონაწილეობა. ვფიქრობთ, ეს კრიტიკულად მნიშვნელოვანია, რომ პროექტი წარმატებულად განხორციელდეს და მივიღოთ ის შედეგი, რაც ყველას გვინდა", - განაცხადა მან.
ეკონომიკის მინისტრის ინფორმაციით, ანაკლიის პროექტში მონაწილეობის მსურველი საკმაოდ ბევრია. „წელს ჩვენს გვქონდა არაერთი შეხვედრა უცხოურ კომპანიებთან, მათ შორის იყო აბუ-დაბის პორტების წარმომადგენლობითი დელეგაცია, რომელიც ადგილზე გაეცნენ პროექტს. ასევე იყო ვიზიტები ცენტრალური აზიის ქვეყნებში, რომლებსაც ასევე აინტერესებთ ეს პორტი."
„ანაკლიის საპორტო ინფრასტრუქტურა შუა დერეფნის ინტერესებს ემსახურება,“ - განაცხადა ვიცე-პრემიერმა.
საქართველოს მთავრობამ 2020 წლის დასაწყისში გამოაცხადა, რომ „ანაკლიის განვითარების კონსორციუმთან“ ღრმაწყლოვანი პორტის მშენებლობის საინვესტიციო ხელშეკრულებას წყვეტს, რადგან კონსორციუმმა ვერ შეასრულა საინვესტიციო ხელშეკრულებით გათვალისწინებული ვალდებულებები. კონსორციუმი ამას უარყოფს და საქართველოს მთავრობას ბრალს სდებს სტრატეგიული პროექტის მიზანმიმართულად ჩაშლაში.