მარნეულის ცენტრში "კომენდანტის საათის" დროს ნოვრუზ ბაირამს ზეიმობენ
დაანთეს ტრადიციული ცეცხლი, გამოტანილი აქვთ ტკბილეული. ქალაქში ისვრიან პიროტექნიკას. უკრავენ აზერბაიჯანულ ინსტრუმენტებზე, ისმის ქართული მუსიკაც და ცეკვავენ.
ადგილობრივმა აქტივისტმა ოქტაი ქაზუმოვმა რადიო თავისუფლებას უთხრა, რომ ბოლო მომენტამდე ელოდებოდნენ ხელისუფლების ნებართვას, მაგრამ არ უპასუხეს.
"ეს არის ჩვენი, აზერბაიჯანული თემის, საერო დღესასწაული. ისეთი, როგორიც პირველ იანვარი. ახალ წელს ხელისუფლებამ 1 და 2 იანვარს გააუქმა კომენდანტის საათი, ჩვენც იგივეს ვითხოვთ, ვითხოვთ თანასწორობას", - თქვა ქაზუმოვმა.
მისივე თქმით, ზეიმი, დაახლოებით, 11 საათამდე გაგრძელდება. პოლიცია ადგილზე არ ჩანს.
საკოორდინაციო საბჭომ რამდენიმე დღის წინ აზერბაიჯანულ თემს უარი უთხრა მათთვის გამონაკლისის სახით ერთი დღით კომენდანტის საათის მოხსნაზე.
"კულტურულ-რელიგიურ და სხვა მსგავს დღესასწაულებზე, ხალხმრავლობიდან გამომდინარე და ვირუსის გავრცელების მომატებული რისკის საფრთხის გამო, განსაკუთრებით იმ დროს, როცა ეს შეზღუდვები უკვე მოხსნილია, მსგავს დღესასწაულთან დაკავშირებით შეზღუდვების შემსუბუქება მიზანშეწონილი არაა", - განაცხადა მიზეზზე საუბრისას მთავრობის ადმინისტრაციის ხელმძღვანელმა, ლაშა დარჩიაშვილმა.