შვილიშვილის თანაკლასელებზე ძალადობაში ბრალდებულ ქალს სასამართლომ 4000-ლარიანი გირაო შეუფარდა
თავდაპირველად სხდომა ღია რეჟიმში მიმდინარეობდა, თუმცა ბრალდების მხარემ სხდომის დახურვის შუამდგომლობა დააყენა, რაც მოსამართლემ დააკმაყოფილა. პროცესზე ბრალდებული ადვოკატის გარეშე იყო მისული. მან სხდომის დასრულების შემდეგ მედიასთან კომენტარი არ გააკეთა.
ბავშვებზე ძალადობის შემთხვევა 2020 წლის ნოემბერში მოხდა და მედიაში 4 თვის შემდეგ გაშუქდა. მობილური ტელეფონით გადაღებულ ვიდეოში, რომელიც დაახლოებით 4 წუთს გრძელდება, ჩანს მიწაზე გვერდიგვერდ დაჩოქილი ორი მეექვსეკლასელი ბიჭი, რომლებსაც უფროსები თანაკლასელისთვის ბოდიშის მოხდას აიძულებენ. იქვე დგას მათი კლასელიც.
გამოძიების ინფორმაციით, რომ 2020 წლის 4 ნოემბერს, სკოლის მოსწავლეებს შორის წარმოშობილი კონფლიქტის გამო, მე-6 კლასის მოსწავლეებმა თანაკლასელს ფიზიკური შეურაცხყოფა მიაყენეს, ასევე აიძულეს, დაეჩოქა და თანაკლასელებისთვის ბოდიში მოეხადა. აღნიშნული ფაქტი ცნობილი გახდა მოსწავლის ბებიისთვის, რომელმაც 2020 წლის 8 ნოემბერს შვილიშვილის ორი თანაკლასელი ანალოგიური მეთოდით, მათი ნების საწინააღმდეგოდ, დააჩოქა მუხლებზე და თავისი შვილიშვილისთვის ბოდიში მოახდევინა.
აღნიშნული ფაქტის მობილურით იღებდა ძალადობის მსხვერპლი ერთ-ერთი არასრულწლოვნის მშობელი. პროკურატურა ძალადობაში ბრალდებულ ბებიას სისხლის სამართლის კოდექსის 150-ე მუხლის მეორე ნაწილის "ა" ქვეპუნქტით (იძულება) გათვალისწინებული დანაშაულის ჩადენას ედავება, რაც სასჯელის სახედ და ზომად ითვალისწინებს 18 თვემდე თავისუფლების აღკვეთას.