Гриппка каршы – аракы? Табиблар кире кага!
Куәтле исерткеч эчемлек кешене вируслы йогышлы авырулар һәм грипптан сакламый.
Бу хакта Россия Федераль медик-биология агентлыгының квалификация күтәрү институты йогышлы авырулар кафедрасы мөдире Владимир Никифоров җиткергән.
"Эчкәнгә карап вирус юкка чыкмый, – дигән ул. – Канда тулысынча чиста спирт булсын өчен өч литр аракы эчсәң генә вирус нейтрәльләшә. Әмма кеше ул вакытта исерткеч эчемлектән агуланып үләчәк.
Табиб шулай ук авырган очракта чирнең йогу сәбәбен белгечләр ачыкларга, шуннан соң гына кеше дәвалана башларга тиеш, ди. Үзлегеңнән дәвалана башлау – хата, дигән фикерне алга сөргән ул.