“АК45”нинг “Челси” билан ўйиндаги ҳаракатлари акс этган видео
АПЛ 32-тури доирасида бўлиб ўтган марказий учрашувда “Манчестер Сити” меҳмон сифатида “Челси” майдонида ҳаракат қилиб, кутилганидек юқори даражадаги ўйин намойиш этди ва 3:0 ҳисобида ишончли ғалабага эришди. Бу натижа жамоага чемпионлик пойгасида босимни сақлаб қолиш ва пешқадам “Арсенал” билан фарқни қисқартириш имконини берди.
Ҳозирги вазиятга кўра, Гвардиола шогирдлари очколар бўйича орқада бораётган бўлса-да, икки муҳим ўйин — қолдирилган “Кристал Пэлас” баҳси ва тўғридан-тўғри “Арсенал”га қарши учрашувда ғалаба қозонса, жадвални ўзгартирадиган кучга эга бўлади.
“Челси”га қарши ўйинда “Сити” классик услубига содиқ қолди: тўп назорати, босим ва тезкор ҳужумлар орқали рақибни аста-секин синдириш тактикасини қўллади. Бу эса натижада яна бир ишончли ғалабага олиб келди.
Абдуқодир Ҳусановнинг ушбу баҳсдаги хатта ҳаракатлари нуфузли cityxtra.co.uk портали экспертлари томонидан 6 баллга лойиқ кўрилди. У ўйиннинг бошида муҳим эпизодда ажойиб подкат билан хавфни йўқ қилди ва жамоани қутқарди. Баъзи вазиятларда босим остида хатолар кузатилди, айниқса узун пасларда аниқлик етишмади. Шунга қарамай, умумий ўйини барқарор ва ишончли бўлиб, мураббий ишончига муносиб жавоб берди. Ҳимоя чизиғида ўз вазифасини тўлиқ бажарди ва одатдагидек ортиқча шовқинсиз иш қилди.
Қуйидаги видео орқали унинг мазкур ўйин давомида амалга оширган фойдали ҳаракатларини томоша қилишингиз мумкин: