Абдувоҳид Неъматов баҳсли пенальти ҳақида очиқ ва кескин фикр билдирди

Суперлига доирасида “Насаф” ва “Қўқон-1912” ўртасидаги муросасиз баҳс (1:1)дан сўнг жамоа дарвозабони Абдувоҳид Неъматов ўйин ҳақида ўз муносабатини билдириб, айниқса баҳсли пенальти эпизодига алоҳида тўхталиб ўтди.

Учрашувдан кейин журналистлар аввало унинг жароҳати ҳақида сўрашди. Дарвозабоннинг таъкидлашича, ҳолати жиддий эмас: “Ёмон эмас, икки-уч кун ичида тикланиб, кейинги ўйингача сафга қайтишга ҳаракат қиламан”, – деди у. Шу билан бирга, аниқ ташхис текширувлардан кейин маълум бўлишини ҳам қўшимча қилди.

Баҳснинг энг муҳокамали нуқтасига айланган пенальти ҳақида эса Неъматов анча кескин фикр билдирди. Унинг айтишича, вазиятда у фақат тўп учун курашган ва 11 метрли жарима белгиланганида ҳайратдан кулиб юборган: “Мен тўпга ўйнадим. Пенальти берилганида ҳайрон бўлдим. Бу ҳолат аввал ҳам такрорланган – ўтган мавсум ‘Динамо’га қарши ўйинда ҳам худди шу ҳакам шубҳали қарор чиқарган эди”, – дея эслатди кипер.

Неъматовнинг фикрича, агар ҳақиқий қўполлик бўлганида, у бундан қочмаган бўларди: “Агар пенальтига лойиқ фол қилган бўлсам, ўзим айтардим. Виждоним тоза. Ҳакам эса мени оёқ билан рақибни йиқитди, деди. Мен дарвозабонман, асосан қўл билан ўйнайман. Қўл билан эмас, оёқ билан йиқитдинг дейиш – бу қандай мантиқ?” – дея у ўз норозилигини очиқ баён қилди.

Қисқаси, бу эпизод яна бир бор ҳакамлик қарорлари атрофидаги баҳсларни алангалантирди. Мухлислар эса бу ҳолатга турлича қарамоқда: кимдир ҳакамни қўллаб-қувватласа, яна кимдир Неъматов фикрларини ҳаққоний деб ҳисобламоқда. Футболда эса бундай драмалар ҳар доим интригани янада кучайтиради.