Андрей Аршавин Ҳусановнинг камтарлиги ва Англиядаги илк таассуротлари ҳақида

Россия футболи юлдузи Андрей Аршавин Тошкент сафари чоғида Ўзбекистон миллий терма жамоаси ҳимоячиси Абдуқодир Ҳусанов билан суҳбатлашди ва унинг “Манчестер Сити”га трансфердан кейинги хулқ-атвори ҳақида фикрларини ўртоқлашди.

Аршавин таъкидлашича, Абдуқодир катта маблағга трансфер қилинганига қарамай, жуда камтар кўринади. “Биз у билан гаплашдик ва у менга оддий йигит, институтни тугатган ва спорт кийимидаги оддий инсондек туюлди. Атрофида кўп қўриқчилар бор эди, лекин у ёлғиз қолишни истарди. Янги муҳитда у ҳали ўзини қандай тутишни ва қандай ҳис қилишни тушунаётган эмас, бироз ноқулайлик ҳис қилаётгандек,” – деди Аршавин.

Абдуқодир Ҳусанов Ўзбекистоннинг энг машҳур ва иқтидорли футболчиларидан бири ҳисобланади. У “Бунёдкор” академиясида таълим олган ва профессионал фаолиятини хорижда – 2022 йили Беларуснинг “Энергетик-БГУ” клубида бошлаган.

2023 йилнинг ёзидан у Франция чемпионатининг ўша пайтдаги вице-чемпиони “Ланс”га ўтди. Бир ярим мавсумдан сўнг эса Абдуқодир Англия Премьер-лигасига йўл олди ва 2025 йил 20 январда “Манчестер Сити” 40 миллион еврога трансфер қилиб, жамоа таркибида авлодлар алмашинувини бошлади. Шундан беш кун ўтгач, Ҳусанов “Челси”га қарши дебют ўйинини ўтказди.

Февраль ойида у Англия кубогида “Лейтон Ориент” жамоасига қарши илк голини урди, 2026 йил 24 мартда эса “шаҳарликлар” таркибида Англия лигаси кубогини қўлга киритди. “Арсенал”га қарши бўлиб ўтган ҳал қилувчи баҳсда Ҳусановнинг намойиши мухлислар ва мутахассислар томонидан юқори баҳоланди.

Ўз навбатида, Андрей Аршавин ҳам Англия Премьер-лигасида тўп тепган тажрибали футболчи ҳисобланади. Россияда “Зенит” шарафини ҳимоя қилган Аршавин 2009–2013 йиллар давомида Лондоннинг “Арсенал” клубида ўйнаган.

Бу суҳбат орқали мухлислар Абдуқодир Ҳусановнинг нафақат профессионал салоҳияти, балки оддий ва камтар шахс сифатида ҳам ажойиб эканини яна бир бор билиб олдилар.