Казан үзәгендә берничә кешенең үлеменә китергән юл һәлакәтенең видеосы чыкты
Дәүләт автоинспекциясе узган ялларда Петербург һәм Назарбаев урамнары чатында булган юл-транспорт һәлакәтенең видеосын чыгарды.
«Татар-информ» агентлыгы хәбәр иткәнчә, Lexus автомобиленең йөртүчесе, Назарбаев урамына таба хәрәкәт иткәндә, «Уң якка хәрәкәт» билгесе таләбенә игътибар итмичә, зур тизлектә бетон коймага килеп бәрелгән. Нәтиҗәдә, автомобиль әйләнеп капланган һәм туктап торган биш машинага орынып үткән. Шуннан соң аңа ут капкан.
Юл-транспорт һәлакәте нәтиҗәсендә Lexus автомобиленең йөртүчесе һәм ике пассажиры шунда ук үлгән. Дәүләт автоинспекциясендә ачыклык кертүләренчә, аларның өчесе дә Самара өлкәсе кешеләре булган.