Жоан Лапорта: "Ҳакамлар кўпинча «Реал» жамоасига ёрдам беради"

Испания футболидаги абадий рақобат яна янги баҳсларга сабаб бўлди. «Барселона» президенти Жоан Лапорта ҳакамлар фаолияти ҳақида кескин фикр билдириб, улар кўп ҳолларда «Реал» манфаатларини қўллаб-қувватлаётганини таъкидлади.

Лапортанинг сўзларига кўра, «Барселона» доимо рақобатчиларидан кўра кучлироқ ўйнашга мажбур, чунки ҳакамлар томонидан етарлича қўллаб-қувватланмаяпти. У бу ҳолатни очиқчасига нохолислик деб баҳолаб, айрим қарорлар мунтазам равишда «Реал» фойдасига чиқарилаётганини айтди.

Бу каби баёнотлар Испания чемпионатидаги кураш янада қизғин тус олаётган бир пайтда янграмоқда. Ҳозирда Ла Лиганинг 29-туридан кейин каталонияликлар 73 очко билан турнир жадвалида пешқадам бўлиб турибди. Уларнинг энг яқин таъқибчиси — «қайморқанглилар» эса 69 очко билан иккинчи ўринни эгаллаган.

Келаси тур эса янада қизиқарли ўтишга ваъда бермоқда. «Барселона» ўз майдонида «Атлетико»га қарши баҳс олиб борса, «Реал» «Мальорка» билан куч синашади. Бу учрашувлар чемпионлик пойгасида ҳал қилувчи аҳамият касб этиши мумкин.

Шубҳасиз, Лапортанинг бу баёноти футбол жамоатчилигида катта муҳокамаларга сабаб бўлади. Энди эътибор нафақат майдондаги ўйинга, балки ҳакамлар қарорларига ҳам қаратилмоқда. Чунки мавсумнинг ҳал қилувчи палласида ҳар бир қарор чемпионлик тақдирига таъсир ўтказиши мумкин.